Тошкент темир йўл муҳандислари институти, Тошкент автомобиль йўлларини лойиҳалаш, қуриш ва эксплуатацияси институти ва Тошкент давлат техника университетининг авиакосмик технологиялари факультети негизида Тошкент транспорт университети ташкил этилади. Бу ҳақда Транспорт вазирлиги ахборот хизмати хабар берди.
Ўзбекистон Президентининг бу борадаги тегишли қарорида келтирилишича, университет олдига транспорт соҳаси учун кадрлар тайёрлаш, тизимга хорижий тажриба ва халқаро стандартларни жорий этиш, шунингдек, соҳанинг илмий салоҳиятини ошириш мақсад қилиб қўйилган.
Ректорнинг биринчи ўринбосари хорижлик мутахассис бўлади. Университет учун дастурлар Германия, Хитой ва Жанубий Корея билан ҳамкорликда тайёрланади.
Янги ўқув йилидан бошлаб бакалавриатнинг 46 та йўналиши билан бирга, талабалар мутлақо янги 18 йўналишда таълим олиши мумкин. 2020/2021-ўқув йилидан университетда кредит-модуль таълим тизими жорий этилади. Ҳар бир факультет қошида олтитадан илмий-тадқиқот лабораториялари фаолият кўрсатади.
Таълимнинг асосини амалиёт ташкил этади. Талабалар ҳафтасига бир кун мутахассислигига мос келадиган объектларда бўлади. Талабалар нафақат авто, авиа ва темир йўл транспорти мутахассиси сифатида, балки логистика соҳасида ҳам тайёрланади.
Университетга унинг таркибига кирувчи олий таълим муассасаларининг бинолари берилади. Бундан ташқари, яна учта янги объект қурилади, мавжудлари реконструкция қилинади. Буларнинг барчасига 243 миллиард сўм сарфланиши кутилмоқда.
Изоҳ (0)