АҚШ Касалликларни назорат қилиш ва олдини олиш маркази (CDC/CAR) Марказий Осиё ҳукуматларининг COVID-19’га қарши саъй-ҳаракатларини қўллаб-қувватлаш мақсадида 6,8 миллион доллар ажратди, бунинг 2,07 миллион доллари эса Ўзбекистонга берилади, деб хабар бермоқда АҚШнинг Ўзбекистондаги элчихонаси.
Ушбу маблағ COVID-19 тестлари учун лаборатория жиҳозлари ва асбоб-ускуналар сотиб олишга сарфланади.
Шунингдек, ажратиладиган маблағ CDC Атлантада очганига ўхшаш Ўзбекистон соғлиқни сақлаш тизимида шошилинч тиббий операциялар марказини ташкил этиш мақсадида тегишли жиҳозлар харид қилиш ва тренинг ўтказишга сарфланади.
Қайд этилишича, CDC чегара кириш пунктларида текширувдан ўтказиш учун техник кўмак ҳам беради, бу эса мамлакатнинг чегараларда шахсларни аниқлаш ва жавоб қайтариш қобилиятини мустаҳкамлайди.
Аввалроқ Жаҳон банки коронавирус оқибатларини бартараф этиш учун Ўзбекистонга 95 миллион доллар миқдоридаги маблағга қўшимча сифатида 200 миллион доллар ажратишни маъқуллагани хабар берилган эди. АҚШ ҳукуматининг Халқаро ривожланиш бўйича агентлиги (USAID) Ўзбекистонга COVID-19 коронавирусига қарши курашда қўшимча кўмак берилишини билдирган.
Ўзбекистон Президентининг 22 апрелда имзолаган қарорига кўра, пандемия оқибатларини камайтириш учун 2020 йилда 3,1 миллиард доллар жалб қилиш режалаштирилган. Республикада коронавирусга қарши кураш учун ташкил этилган «Ўзбекистон Меҳр-шафқат ва саломатлик» жамғармасига 50 миллиард сўмдан ортиқ маблағ ўтказилган.
Ўзбекистонда 6 май соат 17:00 ҳолатига кўра, коронавирус инфекциясини юқтириб олганлар сони 2231 нафарга етган. Касаллик илк бор қайд этилганидан буён беморларнинг 10 нафари вафот этди, 1577 нафари соғайди. Айни вақтда 644 киши даволанишда қолмоқда.
Изоҳ (0)