Шавкат Мирзиёев раислигида 5 май, сешанба куни карантин шароитини янада енгиллаштириш ва иқтисодий фаолиятни қайта тиклаш чора-тадбирлари юзасидан видеоселектор йиғилиши ўтказилди. Бу ҳақда Президент матбуот хизмати хабар берган.

Фото: Президент матбуот хизмати

Хабарда Ўзбекистонда эпидемиологик вазият ижобий томонга ўзгараётгани боис 22 апрелдан карантин шароити босқичма-босқич юмшатила бошлангани, мазкур ишларни изчил давом эттириш мақсадида жойлардаги вазият ўрганилгани ва ҳар бир тармоқ ва ҳокимликлардан асосланган таклифлар олингани қайд этилган.

Йиғилишда ушбу таклиф ва таҳлиллар асосида бундан буён амалга ошириладиган ишлар муҳокама қилинган.

Фаолияти тикланган саноат, қишлоқ хўжалиги ва қурилиш соҳаларига қўшимча равишда хизмат кўрсатиш субъектлари ҳам босқичма-босқич ишга туширилиши белгиланди.

Жумладан, эпидемиологик вазият яхши бўлган ҳудудларда санитария талабларини белгилаган ҳолда ноозиқ-овқат дўконлари, тиббий диагностика, такси хизмати, таъмирлаш, тикувчилик, маиший техника ва пойабзал тузатиш, сартарошхоналар фаолиятига рухсат бериш кераклиги қайд этилди. Шунингдек, стикерлар бекор қилиниб, шахсий автомобиллардан фойдаланиш мумкин бўлиши таъкидланди.

Бироқ коронавирус тўла бартараф бўлмагани сабабли одамлар кўп тўпланадиган объектлар, жумладан, театр, концерт ва спорт заллари, тўйхоналар, жамоат транспорти бўйича чекловлар маълум муддатгача сақланиб қолади.

Республика махсус комиссиясига хизмат кўрсатиш турларини қайси ҳудудларда ва қандай шартлар асосида йўлга қўйишни белгилаш топширилди.

«Эпидемиологик вазият яхшилангани сари чекловларни бекор қилишни давом эттирамиз. Аксинча, вазият ёмонлашса, карантин чораларини қайта тиклаймиз», — деди Шавкат Мирзиёев.

Эслатиб ўтамиз, Ўзбекистонда 30 апрелдан бошлаб Республика махсус комиссиясининг қарорига мувофиқ, соат 07:00 дан 10:00 гача ҳамда соат 17:00 дан 20:00 га қадар шахсий ва хизмат машинасида ишга бориб-келиш, дорихона, озиқ-овқат ва бошқа зарурий воситаларни харид қилишда автомобилдан фойдаланишга рухсат берилган. 4 майдан Тошкент шаҳридаги «паспорт столлари» фаолиятини қайта бошлаган.