АҚШнинг Жоржия штати губернатори келгуси бир ҳафтада ҳайдовчиларга йўлда ўтказиладиган имтиҳонсиз гувоҳнома олиш имконини берувчи қарорни имзолайди. Бу ҳақда Motor хабар берди.
Лицензия олиш учун онлайн тестдан ўтиш кифоя.
Мамлакат қонунчилигига кўра, ҳайдовчилик гувоҳномасини фақатгина йўлда ўтказиладиган имтиҳонни муваффақиятли топширгандан сўнг олиш мумкин эди. Бироқ Жоржия штати губернатори Брайан Кемп коронавирус пандемияси туфайли ушбу жараённи соддалаштирувчи қарорни қабул қилди.
Ҳайдовчилик гувоҳномасини олиш учун талабгор онлайн тарзда йўл ҳаракати қоидаларини билиши юзасидан тест топшириши керак. Енгиллаштирилган чора-тадбирлар юк автомобили ва мотоцикл ҳайдовчиларига нисбатан қўлланилмайди. Улар карантин тугашини кутади ва фақат шундан кейингина анъанавий тарзда имтиҳон топширади.
Тест топширган бўлажак ҳайдовчи ота-онаси ёки машина бошқариш бўйича инструктордан 40 соатлик мажбурий автомобиль ҳайдаш машғулотларига қатнашганлиги ҳақида тасдиқ хатини ҳам тақдим этиши керак бўлади. Шунингдек, бир йил-у бир кундан кам бўлмаган ҳайдовчилик стажи ҳам талаб этилади.
Натижада ҳайдовчи ўқувчилик ҳуқуқи ўрнига автомобилни вақтинчалик бошқариш ҳуқуқини қўлга киритади. Янги ҳайдовчига бир қанча чекловлар қўлланилади. Масалан, у ярим тундан эрталабки 6:00 га қадар кўчага чиқа олмайди. Автомобиль салонида тўлақонли ҳайдовчилик ҳуқуқига эга катта одам бўлиши керак.
Изоҳ (0)