Tesla Semi ҳайдовчисиз электр юк машинаси ишлаб чиқаришни яна кечиктирди

Tesla компанияси Semi ҳайдовчисиз электр юк машинасининг ишлаб чиқарилиши яна бироз муддатга кечиктирилишини маълум қилди, деб ёзади Motor.

Дастлаб электр юк машинаси 2019 йилда ишлаб чиқарилиши режалаштирилган эди, кейин 2020 йилга қолдирилди.

Хабарда айтилишича, янги модель 2021 йилда ишлаб чиқарила бошлайди. Шундай қилиб Tesla Semi белгиланган муддатдан икки йилга кечикмоқда.

Tesla Semi электр юк машинаси ишлаб чиқариши ҳақида 2017 йилда маълум қилган эди.

Модификациясидан қатъи назар 20-23 тонна юкни ташиш имкониятига эга бўлган электр юк машинаси автопилот ва электр қуввати билан жиҳозланган бўлиб, у 20 сонияда жойидан соатига 97 километргача тезлашишни таъминлайди.

Модель иккита версияда тақдим этилади: битта қувватланишда 480 километргача йўл боса оладиган Standart ёки битта қувватланишда 800 километр йўл боса оладиган Long Range.

Ишлаб чиқариш муддатининг ортга сурилаётганига қарамай компания Semi’га буюртма қабул қилмоқда. Электр юк машинасига электрон навбатга туриш учун 150 минг доллар олдиндан тўловни амалга ошириш керак.

Tesla аллақачон Semi’ни синовдан ўтказмоқда. Юк машинаси бир неча марта АҚШ йўлларида синовдан ўтказилган.