Тошкент вилояти Ўрта Чирчиқ туманида жойлашган иккита пиёдалар ўтиш жойи янгича кўринишда жиҳозланди. Бу ҳақда вилоят ИИББ ЙҲХБ матбуот хизмати хабар берди.
Вилоят ЙҲХБнинг маълумот беришича, ҳозирги кунга содир бўлаётган йўл-транспорт ҳодисаларининг ҳар иккитадан биттаси пиёда иштирокида содир бўлмоқда. Ушбу ЙТҲларнинг аксарияти эса куннинг қоронғи вақтида юз бермоқда.
«Йўлларда пиёдалар иштирокида содир этилиши мумкин бўлган турли кўнгилсиз ҳолатларнинг олдини олиш мақсадида Ўрта Чирчиқ тумани ҳудудида жойлашган пиёдалар ўтиш жойларида пиёдалар учун қулайлик яратилди. Ҳозирги кунда бу ердаги иккита пиёдалар ўтиш жойи мутлақо янгича кўринишда жиҳозланди. Яъни йўлнинг бутун эни бўйлаб уч қатор қилиб ёниб-ўчиб турувчи чироқлар ўрнатилди. Қоронғида бу чироқлар анча узоқ масофадан ҳам ҳайдовчиларга кўриниб туради. Бу эса тунда содир бўлаётган пиёдалар иштирокидаги ЙТҲларни олдини олишган ёрдам беради», — дейилади вилоят ЙҲХБ хабарида.
Пиёдалар йўлдан ўтиши олдидан йўл бўйига ўрнатилган тугмани босганидан сўнг чироқлар ёнади ва 30 сония давомида пиёдалар йўлини ёритиб туради.
Тошкент вилояти ИИББ ЙҲХБнинг маълум қилишича, келгусида бу каби чироқлар вилоятнинг кўплаб шаҳар ва туманларига, айниқса, сунъий ёритилмаган йўлларга ўрнатилади.
Изоҳ (0)