Хитойлик олимларнинг янги тадқиқоти натижаларига кўра, эркакларнинг COVID-19’дан ўлиш даражаси аёлларга нисбатан 2,5 баравар юқори, касалликнинг ўзи эса эркакларда нисбатан оғирроқ шаклда ўтади. Тадқиқот натижалари Frontiers in Public Health журналида эълон қилинди.
COVID-19 инфекцияси кўп жиҳатдан олимлар учун жумбоқ бўлиб қолмоқда. Хусусан, олимлар нима учун касаллик баъзиларда ўлим хавфини юзага келтираётгани, баъзиларда эса белгиларсиз ўтаётганини ҳали ҳам тушунмаяпти.
Пандемия бошланганидан буён асосий хавф гуруҳига кексалар ҳамда диабет, юрак-қон томир ва нафас олиш йўллари касалликлари каби бошқа касаллиги бўлган кишилар кириши деярли тушунарли эди. Болаларда эса COVID-19 нисбатан енгил шаклда ўтиши ҳақида ҳам кўплаб маълумотлар берилди.
Пекиннинг Тонгрен касалхонаси шифокорлари COVID-19 билан хасталаниш ва ундан вафот этиш бўйича жинслар ўртасидаги фарқ юзасидан биринчи таҳлилни амалга оширди.
Тадқиқот раҳбари Жинь-Куи Яннинг маълум қилишича, январь ойининг бошида COVID-19’дан вафот этаётган эркакларнинг сони аёлларга нисбатан кўп эканлиги кузатилган.
Таҳлилга шифокорларнинг ўзи томонидан даволанган 43 нафар бемор ва барча учун очиқ бўлган базадан 1056 нафар беморнинг маълумотлари олинган. Янги SARS-CoV-2 коронавируси 2003 йилда тарқалган SARS вирусига ўхшашлиги ҳисобга олинган ҳолда, олимлар 2003 йилдаги SARS вируси билан касалланган 524 нафар беморнинг маълумотларини ҳам олган. Танлаб олинган беморлар ичида касалланган эркаклар ва аёлларнинг ёши ва сони бир хил бўлган.
Тадқиқот муаллифларининг хулосаларига кўра, COVID-19 билан оғриган беморлар орасида касаллик белгилари нисбатан оғир бўлган ва ўлим хавфи юқорироқ бўлганлар гуруҳини асосий касалликка қўшимча бошқа касалликлари бўлган кексалар ташкил қилган. Бироқ қолган беморларнинг ичида эркакларда касаллик аёлларга нисбатан оғирроқ шаклда ўтган.
COVID-19 бўйича таҳлил қилинган беморлар ичида вафот этганларнинг 70 фоизини эркаклар ташкил қилган. Бу эса эркакларда ўлим хавфи ёшидан қатъи назар аёлларга нисбатан 2,5 баравар юқорироқ эканлигини билдиради. 2003 йилдаги SARS вируси билан касалланган беморларда ҳам шунга ўхшаш ҳолат кузатилган.
Қизиқ томони шундаки, вируснинг ҳужумида иштирок этадиган ACE2 оқсилларининг даражаси SARS инфекциясида ҳам, COVID-19 инфекциясида ҳам юрак-қон томир касалликлари ва диабети бор беморларда, шунингдек, ёшидан қатъи назар эркакларда юқори бўлган. Тадқиқот муаллифларининг фикрича, айнан шу омил вируснинг эркакларга кучлироқ ҳужум қилишига аосий сабаб бўлиши мумкин.
Олимларнинг фикрича, нима сабабдан COVID-19 эркакларда оғирроқ ўтиши ва ўлим даражаси юқори эканлигини аниқлаш учун қўшимча ва нисбатан кенг қамровли тадқиқотлар ўтказиш керак. Олинган натижалар эркаклар коронавирус олдида нисбатан ожизроқ эканлигини кўрсатувчи ва энг кўп зарар етадиган гуруҳни аниқлашга ёрдам берадиган аниқ далил ҳисобланади.
Тадқиқот раҳбари кекса ёшли эркак беморларга қўшимча ғамхорлик қилишни ва зудлик билан уларни интенсив терапия бўлимига жойлаштиришни тавсия қилган.
Изоҳ (0)