Тошкент шаҳар ИИББ шахсий автомобилда ҳаракатланишга рухсат этилиши муносабати билан ҳайдовчиларга мурожаат қилди

Ўзбекистонда карантин сабабли шахсий автомобиллардан фойдаланишга қўйилган чеклов 30 апрель кунидан бошлаб енгиллаштирилгани ҳақида хабар берилган эди. 30 апрель кунидан бошлаб соат 07:00 дан 10:00 гача ва соат 17:00 дан 20:00 гача барча турдаги енгил автомашиналар йўловчилари билан бирга иш жойларига бориш, зарурий дори воситалари ва озиқ-овқат маҳсулотларини харид қилиш учун ҳаракатланиши мумкин.

Тошкент шаҳар ИИББ автомобилларнинг ҳаракатланиши рухсат берилиши муносабати билан ҳайдовчилардан машиналарда ҳаракатланишдан олдин уларнинг тўлиқ ва яхши иш ҳолатда эканлигига ишонч ҳосил қилишни сўради.

Хусусан, Тошкент шаҳар ИИББ автомобилнинг техник ҳолатини текширишда двигатель, тормоз ва бошқарув тизими, ёрдамчи жиҳозлар (тозалагичлар ёруғлик ва овоз сигналлар), шиналар ҳамда давлат рақамларига алоҳида эътибор беришни сўраган.

Ёқилғи ва бошқа суюқликлар ҳолатини текшириш ва сизиб чиқмаётганлигига, огоҳлантириш белгиси борлигига ишонч ҳосил қилиш керак.

«Ёдингизда бўлсин, техник носозлик бўлган транспорт воситаларидан фойдаланиш йўл ҳаракати қоидалари томонидан тақиқланган.

Йўлларда кескин ҳаракатланманг ва қайрилманг, аста қўзғалиб секин тўхтанг, аста-секин тезликни оширинг ҳамда пасайтиринг. Йўл ҳаракати, об-ҳаво ва йўл белгилари талаблари асосида ҳаракатланинг. Йўл ҳаракати қоидаларига тўлиқ риоя қилинг ва ҳаракат вақтида эътиборли бўлинг.

Ёдингизда тутинг, сиз, сизнинг йўловчиларингиз ҳамда бошқа ҳаракат иштирокчиларининг соғлиғи ва ҳаёти сизнинг йўллардаги ҳаракат маданиятингизга боғлиқ.

Эътиборингизни шунга қаратмоқчимизки, республика махсус комиссияси белгилаган вақтдан ташқари транспорт воситаларида ҳаракатланиш карантин қоидаларини бузишга олиб келади», — дейилади Тошкент шаҳар ИИББ мурожаатида.

Эслатиб ўтамиз, Ўзбекистонда вилоятлараро, Тошкент ва Нукус шаҳарлари ҳамда вилоятлар марказларида 30 март соат 06:00 дан 20 апрель соат 00:01 га қадар шахсий транспортдан фойдаланишга чеклов қўйилган эди. Фақат Давлат хизматлари марказлари томонидан бериладиган махсус рухсатнома (стикер)лар асосида автотранспорт воситалари ҳаракатланишига рухсат берилган. Махсус рухсатномасиз ҳаракатланган фуқароларга нисбатан Маъмурий жавобгарлик тўғрисидаги кодекснинг 54-моддаси асосида жарима қўлланилиб, автотранспорт воситаси карантин охиригача жарима майдончасида қолади.