Ўзбекистон ҳудуди бўйлаб 27—28 апрель кунлари юз берган кучли шамол натижасида ишдан чиққан электр тармоқларининг фаолияти қайта тикланмоқда. Айни пайтда табиий офатдан энг кўп талафот кўрган ҳудуд — Бухоро вилоятида ҳаво тармоқларини тиклаш ишлари давом этмоқда, деб хабар беради «Ўзбекистон миллий электр тармоқлари» АЖ матбуот хизмати.
Хусусан, зарар етган таянч устунларини таъмирлаш ҳамда янгилаш ишлари билан бир нечта бригадалар томонидан тонгги соат 06:00 дан тунги 00:00 га қадар иш режими йўлга қўйилган.
Мисол учун, вилоятнинг Қоракўл тумани «Тайқир» МФЙ ҳудудидаги чўл зонасида 70 нафардан ортиқ мутахассис-ходим «Ҳамза-2» линиясининг таянч устунларини тиклаш билан шуғулланяпти.
«Тайқир қишлоғида иш олиб бораётган энергетиклар тасарруфида 4 та автокран, 1 та бульдозер, 2 та экскаватор, 3 та таянч устуни ташиш юк автомобиллари ҳамда 5 та махсус устахонали юк машинаси мавжуд. Улар юқори кучланишли ҳаво тармоғининг 8 та таянч устунини тикламоқда», — дейилади хабарда.
Мавзуга доир: Ўзбекистонда юз берган кучли шамол сабабли ишдан чиққан электр тармоқларининг иши қайта тикланмоқда
Изоҳ (0)