Қарши давлат университети ўқитувчиси ойлик маошидан 15 нафар талабага стипендия тайинлади. Бу ҳақда «Дарё»га университет ахборот хизмати раҳбари Ойбек Юсупов хабар бермоқда.
Маълум бўлишича, университетнинг Ботаника ва экология кафедраси мудири, биология фанлари доктори, профессор Лутфулла Ёзиев уч ой — июнь, июль, август ойларида 15 нафар чин етим талабанинг ҳар бирига 100 минг сўмдан стипендия тўлаб боради.
«Мазкур ташаббус вилоятдаги мавжуд олийгоҳ ўқитувчиларидан чиққан биринчиси бўлди. Ўйлаймизки, университетимизнинг бошқа ўқитувчилари ҳам хайрли ишни давом эттиради», — дейди Ойбек Юсупов.
Маълум бўлишича, айни кунда университетда 14 минг нафардан ортиқ талаба таҳсил олади.
Эслатиб ўтамиз, 2018 йил қашқадарёлик 83 ёшли отахон, тарих фанлари номзоди Мухтор бобо Шапсанов ҳам Мирзо Улуғбек номидаги Ўзбекистон Миллий университетининг физика факультети талабалари учун Мухтор Шапсанов номидаги стипендияни таъсис этганди.
Изоҳ (0)