Ўзбекистонда ҳомиладор ёки туққан аёллар коронавирус инфекциясига гумон қилинса, қандай йўл тутилади? Шундай ҳолатларда қаерга мурожаат қилиш керак? Уларнинг даволаниш тартиби қандай бўлади? Шу каби саволларга Соғлиқни сақлаш вазирлиги бошқарма бошлиғи Барно Абдусаматова жавоб берди.
Унинг айтишича, Соғлиқни сақлаш вазирлиги Жаҳон соғлиқни сақлаш ташкилоти (ЖССТ) билан биргаликда алоҳида миллий клиник қўлланма ишлаб чиққан бўлиб, шу асосида даволаш ишлари олиб борилади.
Ҳозирги кунда республика бўйича COVID-19 инфекцияси билан касалланганлар билан мулоқотда бўлган ҳомиладор аёллар учун 740 шифо-ўринга эга 14 та туғруқ комплекслар, коронавирус инфекцияси тасдиқланган ҳомиладор аёллар учун эса 360 шифо-ўринга эга бўлган 13 та туғруқ комплекслари яратилган.
«Шу ўринда айтиш керакки, ҳомиладор аёлларда қуруқ йўтал, тана ҳароратининг кўтарилиши, нафас қисилиши, ҳолсизлик, иштаҳа йўқлиги, мушакларда оғриқ аломатлари пайдо бўлганда уйдан чиқмаган ҳолда яшаш манзилларидаги участка шифокорига ёки аёллар маслаҳатхоналарига мурожаат қилишлари зарур. Карантин даврида ҳомиладорлар шошилинч ҳолатлардан ташқари шифокорлар маслаҳатлашувларини масофавий алоқа (телефон, видеоалоқа ва бошқалар) орқали ўтказишлари тавсия этилади», — дейди Барно Абдусаматова.
Мавзуга доир: Ҳомиладор аёллар коронавирусдан қандай сақланиши керак?
Барно Абдусаматованинг таъкидлашича, бу энг аввало, она аҳволининг оғирлиги, ҳомиланинг яшаб кетиши ва соғломлиги каби кўплаб омилларга боғлиқ. Агар коронавирус инфекцияси мавжуд бўлган ҳомиладор аёлнинг аҳволи оғир ёки ўта оғир деб баҳоланадиган бўлса, унда диагностик мезон ва халқаро тиббий тавсияларга мувофиқ, ҳаётий кўрсатмаларга кўра, ҳомиладорлик муддатига қарамай туғдиришни амалга ошириш керак. Аммо ҳозирги кунда коронавирус инфекциясига чалинган ҳомиладор аёлларда бу касаллик ҳомила учун жиддий асоратлар хавфи юқорилиги тўғрисида ҳеч қандай далиллар мавжуд эмас.
COVID-19 инфекциясига чалинган аёлда ҳомиладорлик муддатига етган бўлса, туғруқ усулини танлаш акушерлик кўрсатмалари асосида индивидуал амалга оширилади. ЖССТ кесарча кесишни фақатгина тиббиёт нуқтаи назаридан ўринли деб топилгандагина ўтказишни тавсия этади.
Мавзуга доир: Карантин сабабли ёпилган Республика перинатал маркази май ойида очилиши мумкинлиги айтилди
«Туғруқ мураккаб жараён. Айрим юқумли касалликка чалинган оналарнинг фарзандида онадаги инфекциялар бўлмаслиги мумкин. Аммо коронавирус бутун дунё шифокорлари учун ҳам кутилмаган касаллик бўлди. Тўғри, коронавирус инфекцияси мавжуд бўлган ҳомиладор аёлдан туғилган болага инфекция ўтадими, деган савол ҳар бир аёлнинг хаёлидан ўтиши табиий. Мутахассисларнинг маълум қилишларича, янги туғилган чақалоқларда коронавирус инфекцияси ўтган ҳолатлар нисбатан кам қайд этилган, агар ушбу инфекция болага ўтган тақдирда ҳам, барча ҳолатлар енгил шаклда кечган», — дейди ССВ бошқарма бошлиғи.
Унинг айтишича, касалланган ҳомиладор аёлдан туғилган чақалоқ, у туғилгандан сўнг 12—24 соат ўтгач, албатта, коронавирус инфекциясига текширилади. Натижаларни тасдиқлаш учун такрорий тест 24 соатдан кейин амалга оширилади. Текширув учун биоматериал сифатида бурун-ҳалқум ёки оғиз-ҳалқумдан суртма олинади.
Коронавирус инфекцияси мавжуд бўлган она ўз боласини кўкрак сути билан озиқлантириши мумкинми?
«Ҳаммамизга маълумки, она сути турли касалликларни чақирувчи вирус ва микробларга қарши курашувчи моддаларга бой бўлади. Яъни, у болада иммунитет тизимининг шаклланишида қатнашади. Ундаги иммуноглобулинлар янги туғилган чақалоқни турли инфекциялардан ҳимоя қилади, онадан болага иммунитет ўтишини таъминлайди. Шунинг учун ҳам, ЖССТ коронавирус инфекцияси мавжуд бўлган онанинг саломатлик ҳолатига қараб эмизишга рухсат берилишини тавсия этади. Лекин шуни эсдан чиқармаслик керакки, вирус онадан болага ҳаво-томчи ҳамда тўғридан-тўғри мулоқот йўли орқали ўтиши мумкин. Ва шу сабабли оналар чақалоқларни парваришлаш ва эмизиш жараёнида ниқобдан фойдаланишлари, уни ишлатишдан олдин ва кейин қўлларини яхшилаб ювишлари ҳамда хонадаги барча буюмларни хлорли эритмалар билан дезинфекциялаб туришлари шарт», — деб таъкидлаб ўтди Барно Абдусаматова.
Ўзбекистонда 30 апрель соат 10:00 ҳолатига кўра коронавирусга чалинганлар сони 2017 нафарга етди. Бунда соғайганлар сони касалликдан даволанаётганлар сонидан кўп бўлиб турибди. Коронавирусдан соғайганлар орасида ҳомиладор ва яқинда фарзандли бўлган аёл ҳам бор.
Изоҳ (0)