Бухоро вилояти ҳокими вазифасини бажарувчи Карим Камолов «Дарё» мухбири билан суҳбатда кучли шамол оқибатларини бартараф этишда ёрдам қўлини чўзаётган вилоят ҳокимлари ҳақида гапирди.
«Синовли кунларда биринчилардан бўлиб, 200 нафар қурувчи билан беминнат кўмакка шошилган Қашқадарё вилояти ҳокими Зоир Мирзаев ва танти халқига ўз миннатдорлигимни билдираман. Афсуски, карантин чекловлари сабаб бу кўмак гуруҳи Бухоро чегарасидан Қашқадарёга қайтарилган ва махсус кўрикдан ўтказилгач, рухсат этилиши назарда тутилган. Шунга қарамай бу бизга, бухороликларга катта куч ва мадад бағишлади. Шу ўринда, Самарқанд, Хоразм, Навоий, Сурхондарё вилояти раҳбарларига, шунингдек, Давлат божхона қўмитаси раҳбариятига Бухоро халқи номидан ташаккуримни билдираман. ‘Дўст кулфатда билинади’, деганларидек беғараз кўмак ва ёрдамга ошиқаётганлар бисёр. Мана шундай кунда бизни суяб, қўллайдиган эл бор экан, Олот ва Қоракўл жамоли олдингидан-да, кўркамлашади», — дейди Карим Камолов.
Мавзуга доир: Шавкат Мирзиёев — Бухорога ёпирилган шамол ҳақида: Бундай табиий офат илгари кузатилмаган
Маълум бўлишича, 29 апрель куни вилоятга Самарқанддан Олот ва Қоракўл туманлари аҳолиси учун икки минг дона шифер, ўн тонна картошка, тўрт тонна сабзи, тўрт тонна пиёз ва икки тонна ўсимлик мойи инсонпарварлик ёрдами сифатида юборилган.
Айни кунда Олот ва Қоракўл туманларида зарарланган турар жойлар ва инфратузилма объектларини таъмирлаш, аҳоли яшаш жойларини тиклаш ва тузатиш ишлари бажарилмоқда.
«Содир бўлган табиий офат одамларни яна бир карра жипслаштирди. Инсон табиат ҳодисаси олдида ожиз бўлса-да, унинг оқибатларини бартараф этишга қодир. Айниқса, одамларнинг якдиллиги, бир-бирини қўллаб-қувватлаши бизга куч бермоқда. Ҳудудда ҳамма бунёдкорлик ва ободонлаштиришдек хайрли ишга улуш қўшишга чоғланган. Одамларнинг қўли-қўлига тегмаяпти. Заҳматкаш халқимиз билан ҳадемай, қисқа фурсатда ҳаммаси ўз ҳолига қайтиши, шубҳасиз», — деб қўшимча қилди Карим Камолов.
Эслатиб ўтамиз, Президент Шавкат Мирзиёев 28 апрель, сешанба куни, Бухоро вилоятининг Олот ва Қоракўл туманларида бўлиб, ҳудудда 27 апрель куни кузатилган табиий офат оқибатларини кўздан кечирганди. Ўша учрашувда Шавкат Мирзиёев «Ҳеч қандай зарар бўлмайди... Иккала туманни ҳам янгилаб оламиз. Ромитанни янги қилгандик, ундан ҳам янги қиламиз. Олотда ҳам эски шиферлар... Майли, бунинг ҳам кетгани — улуғ айём кунларида садақа дейди — садақа бўлсин-да, ҳаммасини янгилаб бераман», деганди.
Изоҳ (0)