Qarshi davlat universiteti o‘qituvchisi oylik maoshidan 15 nafar talabaga stipendiya tayinladi. Bu haqda “Daryo”ga universitet axborot xizmati rahbari Oybek Yusupov xabar bermoqda.
Ma’lum bo‘lishicha, universitetning Botanika va ekologiya kafedrasi mudiri, biologiya fanlari doktori, professor Lutfulla Yoziyev uch oy — iyun, iyul, avgust oylarida 15 nafar chin yetim talabaning har biriga 100 ming so‘mdan stipendiya to‘lab boradi.
“Mazkur tashabbus viloyatdagi mavjud oliygoh o‘qituvchilaridan chiqqan birinchisi bo‘ldi. O‘ylaymizki, universitetimizning boshqa o‘qituvchilari ham xayrli ishni davom ettiradi”, — deydi Oybek Yusupov.
Ma’lum bo‘lishicha, ayni kunda universitetda 14 ming nafardan ortiq talaba tahsil oladi.
Eslatib o‘tamiz, 2018-yil qashqadaryolik 83 yoshli otaxon, tarix fanlari nomzodi Muxtor bobo Shapsanov ham Mirzo Ulug‘bek nomidagi O‘zbekiston Milliy universitetining fizika fakulteti talabalari uchun Muxtor Shapsanov nomidagi stipendiyani ta’sis etgandi.
Izoh (0)