БМТ ва ЕХҲТ вакиллари Жиззахда «Обод қишлоқ» дастури доирасида қилинган ишлар билан танишди

Бирлашган Миллатлар Ташкилотининг Ўзбекистондаги доимий координатори Хелена Фрэйзер ва Европа хавфсизлик ва ҳамкорлик ташкилоти лойиҳасининг Ўзбекистондаги доимий координатори Жон Макгрегор Жиззах вилоятининг Пахтакор туманида «Обод қишлоқ» дастури доирасида қурилган «Олтинкўл» маҳалласидаги янги турар жой массиви билан танишди. Бу ҳақда «Дарё»га Президент Халқ қабулхонаси ахборот хизмати маълум қилди.

Хабарда айтилишича, туман марказида 1960—1970 йилларда қурилган 88 та барак типидаги уйнинг 611 та хонадонда 939 та оила қийналиб яшаб келган эди.

Ўтган йили бу оилалар учун Олтинкўл маҳалласи ҳудудида 435 та, Олмазор қишлоғида 305 та жами 740 та якка тартибдаги замонавий миллий услубдаги уй қурилди. Барак уйлар эгаларининг қолганлари янги қурилган кўп қаватли уйларга кўчиб ўтди.

Меҳмонлар «Олтинкўл» маҳалласида турар жой массивида янги уйларга кўчиб чиққан одамларнинг яшаш шароити билан танишди. Коммуникация тармоқлари, электр, газ, ичимлик суви, ички йўллар қурилишидаги ишлар билан ҳам қизиқди. Маҳаллада «Пахтасаноат» томонидан бунёд этилган 150 иш ўринли тикувчилик цехи фаолияти билан қизиқди.

– Бу ерда кўрганларим мен учун кутилмаган янгилик бўлди, – дейди БМТнинг Ўзбекистондаги доимий координатори Хелена Фрэйзер. – Одамларнинг уй-жой билан таъминлаш, улар учун яшаш шароити яратиб бериш масаласи БМТ фаолиятидаги энг муҳим масала ҳисобланади. Биз, Ўзбекистон ҳукуматининг бу масалани ҳал этишга жуда катта эътибор билан қараётганидан жуда мамнунмиз. Биз интилишларни ҳар томонлама қўллаб-қувватлаймиз.

Худди шундай фикрларни Европа хавфсизлик ва ҳамкорлик ташкилоти вакили ҳам билдирди.

– Уй одамларга фақат бошпана эмас, бу инсон бехавотир яшайдиган энг биринчи маскандир, — дейди жаноб Жон Макгрегор. – Бу ерда одамлар уй билан таъминланган. Яна бир муҳим жиҳат одамларнинг яшаши учун энг зарур восита бўлган иш жойидир. Европа стандартлари талабларига яқин тикувчилик корхонаси барпо этилгани ҳукумат бу масалани ҳам ҳал этаётганлиги натижасидир. Бу муваффақиятлар одамни қувонтиради.

Шунингдек, меҳмонлар маҳалла гузари қурилиши, савдо ва маиший хизмат кўрсатиш иншоотлари, 50 нафар болага мўлжалланган мактабгача таълим муассасаси, сунъий тўшамали спорт майдончаси қурилиши билан танишди.

Эслатиб ўтамиз, ўтган икки йилда Президент Халқ қабулхоналари бошчилигида «Обод қишлоқ» ва «Обод маҳалла» дастурлари доирасида республиканинг 159 та туман, 30 та шаҳар ва Тошкент шаҳрининг 11 туманларидаги жами 1116 та қишлоқ ва маҳаллаларида истиқомат қилувчи аҳоли фаровонлиги ва турмуш даражасини ошириш бўйича аниқ мақсадга йўналтирилган чора-тадбирлар амалга оширилди.