Андижонда 84 ёшли онахон коронавирусдан соғайди. Ўзбекистонда тузалганлар сони 1126 нафарга етди

Самарқанд ва Сурхондарё вилоятларида 5 нафар, Андижон вилоятида 18 нафар бемор коронавирусдан соғайди ва 30 апрель, пайшанба куни, реабилитацияга кузатилди. Шу тариқа Ўзбекистонда COVID-19 касаллигидан бутунлай соғайганлар сони 1126 нафарга етди. Бу ҳақда Соғлиқни сақлаш вазирлиги хабар берди.

Самарқанд вилоятида 3 нафар, Сурхондарё вилоятида эса 2 нафар, жами 5 нафар коронавирус инфекциясига чалинган бемор тузалиб чиқди. Улар вилоятлар соғлиқни сақлаш бошқармалари масъуллари иштирокида реабилитацияга кузатилди.

Самарқандда соғайганларнинг 1 нафари 39 ёшли эркак, қолган 2 нафари эса 39 ёшли ва 18 ёшли аёллар бўлиб, уларнинг барчаси ушбу вилоятдан. Улар коронавирус инфекциясига чалинганлар билан мулоқотда бўлиб, касалликни юқтириб олган.

Сурхондарёда тузалиб чиққанлар 31 ёшли ва 30 ёшли эркаклар бўлиб, иккиси ҳам Қашқадарё вилоятидан. 2020 йил 27 март куни Москва—Термиз йўналишида чартер рейсда келган ва карантинга олинган. Касаллик аниқлангач, улар шифохонага ётқизилган.

Сурхондарё вилоятида шу пайтга қадар 20 киши коронавирусдан тўлиқ соғайди.

Андижон вилоятида коронавирус инфекциясига чалинган 18 нафар бемор бутунлай соғайди. Улар вилоят соғлиқни сақлаш бошқармаси масъуллари иштирокида реабилитацияга кузатилди.

Соғайганларнинг 5 нафари эркаклар, 13 нафари аёллар бўлиб, барчаси Андижон вилоятидан. Улар коронавирус инфекциясига чалинганлар билан мулоқотда бўлиб, касалликни юқтириб олган. Тузалганлар орасида 84 ёшли онахон ва 2 ёшли бола ҳам бор. Самарали даволаш муолажаларидан кейинги текширув натижалари уларда инфекция йўқлигини кўрсатди.

Шу пайтга қадар Андижон вилоятида коронавирусдан соғайганлар сони 106 нафарга етди.

Аввалроқ Ўзбекистонда коронавирусдан тузалганлар 1100 нафардан ошгани ҳақида хабар берилган эди.

Ўзбекистонда коронавирус инфекциясига чалинганлар сони эса 30 апрель соат 10:00 ҳолатига кўра, 2017 нафарга етди. 15 мартдан буён коронавирусга чалинган беморларнинг тўққиз нафари вафот этди, Мамлакатда 28 апрелдан буён соғайганлар сони айни вақтда касалликдан даволанаётганлар сонидан кўп бўлиб турибди.