Самарқандда фирибгарлик йўли билан ун харид қилиб, аҳолига қиммат нархда сотиб келган шахсларга жиноят иши қўзғатилди

Самарқандда унни сунъий равишда қиммат нархларда сотиб келган шахсларга жиноят иши қўзғатилди. Бу ҳақда Бош прокуратура матбуот хизмати хабар берди.

Департаментнинг Самарқанд вилояти бошқармаси томонидан ҳудудда унни аҳолига кафолатли тарзда ва арзон нархда етказиб беришда таъсир кўрсатаётган шахслар тўғрисида олинган маълумотларга асосан текширув ўтказилган.

Текширувда «Л-Ч» МЧЖга қарашли савдо майдончаси трейдери Ш.П. ва бошқалар «Л-Ч» МЧЖнинг муҳридан алдов йўли билан фойдаланиб, қалбаки ҳужжатларни тайёрлаш орқали биржа битимларини тузиш учун махсус логин ва паролларни қўлга киритгани, сўнгра 6 нафар шахсни мазкур жамиятнинг трейдерлари сифатида расмийлаштириб, ун савдоси билан шуғулланиб келгани аниқланган.

Хусусан, Ш.П. ва бошқалар қалбаки ҳужжатлар асосида брокерлик фаолиятини амалга ошириб, бошқа шахсларга тегишли бўлган логин ва пароллардан ноқонуний фойдаланиб, республикада эълон қилинган карантин даврида аҳоли эҳтиёжи учун зарур бўлган унни сотишда монопол муҳитни вужудга келтирган. Улар 7 та хўжалик юритувчи субъектига қиймати 3,2 миллиард сўмлик 1236 тонна унни олишга эришиб, аҳолига унни сунъий равишда қиммат нархларда сотиб келган.

Мазкур ҳолатлар юзасидан Ш.П. ва бошқаларга нисбатан Жиноят кодексининг тегишли моддаси билан жиноят иши қўзғатилиб, тергов ҳаракатлари ўтказилмоқда.

Аввалроқ Самарқандда эҳтиёжманд оилалар учун мўлжалланган арзон уннинг қопига 15 минг сўм қўшиб сотган маҳалла раиси қамалган эди. Фарғонада ҳам фирибгарлик йўли билан ун харид қилиб, аҳолига қиммат сотаётган корхонага нисбатан жиноят иши қўзғатилди.