Карантин сабабли Ўзбекистон олий ўқув юртларида битирув имтиҳонларини онлайн шаклда ўтказиш режалаштирилмоқда. Бу ҳақда Президент Шавкат Мирзиёев раислигида 30 апрель куни жорий ўқув йилини сифатли якунлаш, битирув ва кириш имтиҳонларини ташкил этиш масалалари муҳокамасига бағишлаб ўтказилган йиғилишда маълум қилинди.
Йиғилишда мазкур жараёнларни сифатли ташкил этиш бўйича топшириқлар берилган.
Таъкидланишича, пандемия сабабли тизимга масофавий технологиялар жорий қилиниб, 10 мингдан зиёд таълим муассасасидаги 7 миллион ўқувчи ва 500 минг талабага онлайн дарс бериш йўлга қўйилди. Бу янги механизм карантин шароитида фанлар ўз вақтида ўзлаштирилишини таъминлаб бермоқда.
Маълум қилинишича, олий таълим муассасаларига ҳужжатлар қабулини такомиллаштириб, масофадан, онлайн шаклда, интернет орқали ҳужжат топшириш имкониятини яратиш зарурлиги та’кидланди. Бу борадаги янги тартиб ва афзалликлар ҳақида аҳоли батафсил хабардор қилинади.
Маълумки, 2020 йилдан ОТМларга кириш имтиҳонлари жами бешта — учта мажбурий ва иккита мутахассислик фани бўйича ўтказилиши белгиланган эди. Лекин карантин шароити ёшларнинг имтиҳонга тўла тайёргарлик кўриш имкониятини ҳам чеклади.
Қолган қисқа вақтдан унумли фойдаланиш имкониятини яратиш мақсадида, жорий йилда имтиҳонларини соддароқ шаклда ўтказиш бўйича масъулларга топшириқлар берилди.
Эслатиб ўтамиз, Шавкат Мирзиёев 29 апрель куни Ўзбекистонда карантин чекловларини енгиллаштириш бўйича дастлабки чораларни маълум қилди. Хусусан, олимларга, илмий-тадқиқот институтлари ходимларига, профессор-ўқитувчиларга санитария-гигиена нормаларини таъминлаган ҳолда ўз лаборатория ва кафедраларида кундалик ишларини давом эттиришларига ижозат берилади.
Изоҳ (0)