Самарқанд вилоятида дўл аралаш ёғган ёмғир сабаб сув тошқини содир бўлди, дея хабар беради «Дарё» мухбири Фарҳод Норбўтаев.
Таъкидланишича, бугун, 29 апрель куни, Самарқанд шаҳри ва Булунғур туманида ёғган ёмғир сабабли сув тошқини юзага келган ва йўлларда ноқулайликларни келтириб чиқарган.
«Дарё»га юборилган видеоларда шаҳарнинг Роҳат қўрғонида жойлашган маҳаллалардаги сув тошқини ҳамда М-37 Тошкент—Самарқанд магистрал йўлининг Булунғур туманидан ўтувчи қисмида юзага келган катта тошқинни кўриш мумкин.
Булунғур туман ҳокимлиги ахборот хизматининг «Дарё»га маълум қилишича, ҳолат юзасидан туман ҳокими ўринбосари Раббимқул Холжигитов раҳбарлигида тезкор ишчи гуруҳ тузилиб, талафот миқдори аниқланмоқда.
Айни вақтда ишчи гуруҳ туманнинг «Лалмикор» маҳалласидаги вазият билан танишмоқда.
Эслатиб ўтамиз, Самарқандда жорий йил 6 апрель куни кузатилган кучли ёғингарчилик оқибатида сув тошқинлари юз бериб, ўнлаб хонадонлар сув остида қолганди.
Изоҳ (0)