Италияда бир сутка ичида 2091 нафар одамнинг коронавирус инфекциясига чалингани аниқланди ва мамлакат миқёсида эпидемия бошланганидан бери COVID-19 юқтириб олиш билан боғлиқ ҳолатлар сони 201 505 тага етди. Бу ҳақда Италия фуқаро муҳофазаси хизмати ҳисоботида маълум қилинган.
Бир кун аввал 1739 та ҳолат қайд этилгани ва бу 10 мартдан бери кузатилган энг паст кўрсаткич экани айтилганди. Бу борадаги рекорд натижа 21 мартда рўйхатга олинган — шу куни бир сутка ичида 6557 нафар кишида коронавирус аниқланганди.
28 апрель ҳолатига кўра, бир сутка ичида 2317 нафар Италия фуқароси коронавирусдан тузалган. Мамлакатдан жами тузалганлар сони 68 941 нафарни ташкил этмоқда. Бир кун аввал эса 1696 нафар беморнинг COVID-19’дан фориғ бўлгани айтилганди.
Коронавирус қурбонларининг сони бир сутка ичида 382 нафарга кўпайиб, 27 359 кишини ташкил қилмоқда. 27 апрель куни вафот этганлар сони 333 нафар экани хабар қилинганди. 26 апрелда эса 14 мартдан бери энг кам ўлим ҳолати қайд этилган. Бу борадаги антирекорд 27 март куни кузатилган: шу куни Италияда 969 нафар одам коронавирус сабаб дунёдан кўз юмган.
Тузалганлар ва вафот этганларни қўшмаган ҳолда ҳисоб-китоб қилинганда янги касалланган фуқаролар сони қисқариб бормоқда – бир суткада 608 нафар ва эпидемия бошланганидан бери жами 105 205 киши.
Шунингдек, интенсив терапия бўлимларидаги беморлар ва оддий даволаниш палаталаридаги кишилар сони ҳам қисқармоқда. 630 нафар бемор касалхоналарни тарк этган, жонлантириш бўлимидан оддий палатага олинганлар эса 93 нафарни ташкил қилмоқда. Жонлантириш бўлимини тарк этаётганлар сони 4 апрелдан бери сезиларли даражада кўпайиб бормоқда ва 28 апрель ҳолатига кўра 1863 нафарга етган, бу 16 мартдаги натижа такрорланаётганини англатади. Касалланганларнинг 79 фоизи уй шароитида «ўзини яккалаш» тартибига ўтган.
Изоҳ (0)