Россия президенти Владимир Путин коронавирус сабаб эълон қилинган ишланмайдиган кунларни 30 апрелдан кейин яна узайтириш тўғрисидаги фармонга имзо чекди. Бу ҳақда Кремль матбуот хизмати хабар қилган.
«Аҳолининг санитар-эпидемиологик осойишталигини таъминлашга қаратилган чораларни узайтириш тўғрисидаги» фармон матнига кўра 6—8 май ходимларнинг иш ҳақи сақланган ҳолдаги ишланмайдиган кунлар деб эълон қилинган. Давлат органларининг барча раҳбарларига 1—10 майда аҳолининг санитар-эпидемиологик осойишталигини таъминлашга эътибор қаратиш вазифаси топширилган.
Ишланмайдиган кунлар аввалгидек узлуксиз ишлаб келаётган ташкилотларга, озиқ-овқат дўконлари, дорихоналар, касалхоналар, коммунал, таъмирлаш, фавқулодда хизматлар ва ҳукумат органларига нисбатан қўлланилмайди.
Путин ишланмайдиган кунларнинг май ойидаги байрамлар даврида ҳам узайтирилиши ҳақида 28 апрелда Россия аҳолисига йўллаган мурожаатида айтиб ўтганди. У ушбу қарорни мамлакатда COVID-19 ҳали ҳам чўққисига чиқмагани ва ушбу давр касалликка қарши курашда муҳим палла эканлиги билан изоҳлаган.
«Роспотребнадзор» раҳбари Анна Попова май байрамлари вақтида фуқаролардан «ўзини яккалаш» тартибини бузмаслик ва бошқа белгиланган талабларга риоя этишни сўраган. Россияда 2020 йил 1—5 май тақвимда белгиланган байрам кунлари ҳисобланади ва ушбу кунларда Баҳор ва меҳнат байрами нишонланади, 9—11 май кунлари эса Ғалаба куни байрам қилинади.
Аввал Россия президентининг матбуот котиби Путин коронавирус билан боғлиқ вазият юзасидан навбатдаги мурожаатни йўллаши ҳақидаги хабарларни инкор этмагани, Дмитрий Песковнинг Россияда карантин қачон тугашини прогноз қилгани, шунингдек, 16 апрелда Путиннинг коронавирус пандемияси туфайли Ғалаба паради ўтказилишини кейинга қолдиргани ҳақида хабарлар берилган эди.
Изоҳ (0)