Ўзбекистон Президенти Шавкат Мирзиёев 29 апрель, чоршанба куни, пандемия даврида аҳолини асосий турдаги озиқ-овқат маҳсулотлари билан кафолатли таъминлаш ва нарх-наво барқарорлигини сақлаш масалаларига бағишланган видеоселектор йиғилиши ўтказди. Бу ҳақда Президент матбуот хизмати хабар берди.
Тадбир аввалида Президент 27 апрель кечаси Бухоро, Навоий, Самарқанд, Қашқадарё вилоятларида юз берган табиий офат ва унинг оқибатларини бартараф этиш чора-тадбирларига ҳамда коронавирус инфекциясига қарши кураш доирасида мамлакатда амалга оширилаётган ишларга алоҳида тўхталиб ўтди, кенг жамоатчиликка мурожаат қилди.
«Хабарингиз бор, мен кеча Бухоро вилоятида бўлиб, юзага келган вазият билан яқиндан танишдим. Бу масала бўйича тузилган Республика комиссияси ва жойлардаги масъул мутасаддилар билан биргаликда ушбу ҳудудларда амалга ошириладиган барча ишларни батафсил муҳокама қилиб, тегишли чора-тадбирларни белгилаб олдик», — деди Президент.
Таъкидланишича, мазкур вилоятларда бир қатор ижтимоий соҳа объектлари, табиий газ ва электр тармоқларига, турар-жой бинолари ва маданий мерос иншоотларига, шунингдек, қишлоқ хўжалиги майдонларига жиддий талафот етган.
Шавкат Мирзиёевнинг қайд этишича, давлат, ҳукумат томонидан табиий офатдан зарар кўрган ташкилот ва хўжаликларга, фуқароларга ёрдам ва кўмак бериш бўйича барча чора-тадбирлар ўз вақтида амалга оширилади.
«Такрор айтаман, бирорта ҳам юртдошимизни, бирорта ҳам оилани ушбу кутилмаган фалокат қаршисида ёлғиз қолдирмаймиз», — дея таъкидлади Президент.
Эслатиб ўтамиз, 27 апрель куни юз берган кучли шамолнинг оқибатлари билан танишиш ва зарар кўрган аҳоли билан мулоқот қилиш учун Шавкат Мирзиёев 28 апрель куни Бухоро вилоятига ташриф буюрди. Президент табиий офатдан Олот ва Қоракўл туманларига етган зарарни вертолётда кузатди ҳамда маҳаллий аҳоли билан мулоқот қилди. Давлат раҳбари табиий офатдан зарар кўрган аҳолига ҳар томонлама кўмаклашиш бўйича топшириқ берди ҳамда Аллоҳдан Ўзбекистонни турли бало-офатлардан асрашини сўраб дуо қилди.
Изоҳ (0)