Ўзбекистон ҳудуди бўйлаб 27—28 апрель кунлари юз берган кучли шамол натижасида ишдан чиққан электр тармоқларининг иши қайта тикланмоқда. Айни пайтда истеъмолчиларнинг йирик қисми босқичма-босқич тармоққа уланиб, табиий офат талафотлари бартараф этилмоқда. Бу ҳақда «Ўзбекистон миллий электр тармоқлари» АЖ акциядорлик жамияти хабар берди.
Маълум қилинишича, табиий офат натижасида Бухоро вилоятида 500/220/10 киловаттли «Қоракўл» подстанцияси, битта 500 киловольтли ва саккизта 220 киловольтли ҳаво тармоқлари авариявий ҳолатда ўчган. Натижада Бухоро вилояти ҳудудига қарашли қуввати 150 мегаватт бўлган насос агрегатлари, «Қандим газни қайта ишлаш заводи» тармоқдан узилган.
Олиб борилган тезкор ишлар натижасида 220 киловольтли «Бухоро» ҳаво тармоғи орқали «Қандим» подстанциясига кучланиш берилган ва «Қандим газни қайта ишлаш заводи»нинг электр таъминоти тўлиқ тикланган.
Шунингдек, табиий офат натижасида 220 киловольтли «Бухоро» тармоғининг бешта, «Ҳамза-1» ва «Ҳамза-2» ҳаво тармоқларининг тўққизта таянч устуни шикастланган.
Қайд этилишича, «Ўзбекистон миллий электр тармоқлари» акциядорлик жамияти бошқарув раиси бошчилигидаги тезкор штаб томонидан етказилаган талафотлар бартараф этилмоқда. «Ҳамза-1» , «Ҳамза-2» ва «Ҳамза-3» подстанцияларига қувват берилиши устида иш олиб борилмоқда.
Жиззах вилоятида жойлашган юқори кучланишли ҳаво линияларига жиддий зарар етмаган бўлса-да, айрим таянч устунлари ўзининг тик ҳолати ва мустаҳкамлигини йўқотган.
«Жиззах магистрал электр тармоқлари» филиали ходимлари 220 киловольт кучланишли «20-Д» ҳаво линиясининг 384-рақамли таянч устунида юзага келган тик ҳолатдан оғишни бартараф этиб, хавфсизлик нуқтаи назаридан вақтинча истеъмолдан узилган электр узатиш тармоғи фаолиятини тўлиқ тиклади ва истеъмолчилар тармоққа қайта уланди.
Табиий офат натижасида Самарқанд вилоятидаги юқори кучланишли ҳаво тармоғининг битта таянч устуни шикастланган. Ушбу таянч устунининг ўрнига янги конструкция монтаж қилинди ва 228-рақамли таянч устуни янгиланганидан сўнг электр тармоғига кучланиш берилди.
Маълум қилинишича, айни пайтда «Ўзбекистон миллий электр тармоқлари» акциядорлик жамиятига қарашли ҳаво тармоқларини тиклаш, яъни зарар етган таянч устунларини таъмирлаш ҳамда янгилаш учун кеча-кундуз иш олиб борадиган бир нечта бригада сафарбар этилган. Тезкор штабда тузилган иш режасига мувофиқ, истеъмолчиларни тармоққа улаш ишлари босқичма-босқич олиб борилмоқда.
Эслатиб ўтамиз, Бухоро вилояти кучли шамолдан сўнг электр таъминотида энг катта талафот кўрган ҳудуд бўлди. Бухорода 27 апрель шамолидан сўнг Қоракўл ва Олот туманлари билан алоқа узилиб қолди. Айнан электр симларининг узилиб тушиши бир кишининг умрига зомин бўлди. Бундан ташқари, кучли шамолдан сўнг Бухоро, Навоий, Сирдарё ва Самарқанддаги салкам 140 минг хонадон газсиз қолди.
Изоҳ (0)