Ўзбекистонда коронавирусга чалинган охирги бемор шифохонадан чиқиб кетганидан кейин 14 кун давомида янги беморлар рўйхатга олинмаса, хотиржам бўлиш мумкин. Бу ҳақда 29 апрель куни АОКАда бўлиб ўтган брифингда Вазирлар Маҳкамаси ҳузуридаги санитария-эпидемиология назорати давлат инспекцияси бошлиғи Нурмат Отабеков айтиб ўтди.
«Коронавирус касаллигининг республикамизда қайд этилиши камайиб бораётгани юртимизда пандемия тамом, тугаяпди дегани эмас» — дейди Нурмат Отабеков.
«Вазият бирмунча юмшаятган бўлса-да, ҳали 1000 дан ортиқ беморлар даволанишни давом эттирмоқда. 85 мингдан кўпроқ фуқаролар карантинда бўлиб туришибди. Мутахассисларнинг фикрича битта коронавирусга чалинган одам эътиборсиз қолиб кетса ва одамлар орасида юрса бир ойда 406 та одамга касалликни юқтириши мумкин экан. Охирги бемор шифохонадан чиқиб кетганидан кейин 14 кун давомида янги беморлар рўйхатга олинмаса, ўшанда биз хотиржам бўлсак бўлади», — деди давлат инспекцияси бошлиғи.
Унинг қўшимча қилишича, ижобий натижаларнинг борлиги (бир кунда рўйхатга олинган беморлардан, касалликдан соғайиб реабилитация марказларига ўтказилаётган фуқароларнинг ортиб бораётганлиги) бизни қувонтиради ҳамда яхши эпидемик барқарор кунларга тезроқ етиб боришга умид уйғотади.Эслатиб ўтамиз, Ўзбекистонда 29 апрель соат 15:30 ҳолатига кўра, коронавирус инфекциясини юқтириб олганлар сони 1969 нафарга етди. Касалликдан 1005 та киши соғайган. Ўзбекистонда 15 мартдан буён коронавирусга чалинган беморларнинг саккиз нафари вафот этган.
Изоҳ (0)