Ўзбекистон Президенти Шавкат Мирзиёев 29 апрель, чоршанба куни, пандемия даврида аҳолини асосий турдаги озиқ-овқат маҳсулотлари билан кафолатли таъминлаш ва нарх-наво барқарорлигини сақлаш масалаларига бағишланган видеоселектор йиғилиши ўтказди. Бу ҳақда Президент матбуот хизмати хабар берди.
Мавзуга доир: Шавкат Мирзиёев Ўзбекистонда карантин чекловларини енгиллаштириш бўйича дастлабки чораларни маълум қилди
«Бунда, яна бир бор такрорлайман, шошилмасдан, пухта ўйлаб, карантин қоидаларига тўлиқ амал қиладиган корхоналар ишини тиклаш лозим», — деди Шавкат Мирзиёев.
Бу борада Наманган вилоятида фаолиятини тўхтатган ёки паст қувватда ишлаётган 10 мингдан зиёд корхонадан 2854 тасининг ишини тиклаш бўйича қарор қабул қилинган. Яна 851 тасининг ишлашига рухсат бериш масаласи ўрганилмоқда.
Хоразм вилоятида 3350 та ишламаётган корхонадан 448 тасининг фаолияти тикланади, 409 таси бўйича ўрганиш ўтказилмоқда.
Жиззах вилоятида иш қувватини пасайтирган 6 мингдан зиёд корхонадан 534 тасининг фаолиятини тиклаш бўйича қарор қабул қилинган, 332 тасига рухсат бериш масаласи кўриб чиқилмоқда.
Тошкент вилоятида иш ҳажми кескин пасайиб кетган 14 мингта корхонадан 5399 тасининг фаолиятини тиклаш бўйича қарор қабул қилинган, 2833 таси бўйича ўрганиш давом этмоқда.
«Бугун ҳокимлар ва сектор раҳбарлари ўз ҳисоботида корхоналар фаолиятини тиклаш бўйича ишларни қандай ташкил этгани ва уларда карантин қоидалари тўлиқ бажарилишини шахсан кафолатлаши тўғрисида ахборот бериши керак», — деди Президент.
Эслатиб ўтамиз, Президент Шавкат Мирзиёев 20 апрель куни бўлиб ўтган йиғилишда коронавирус аниқланмаган ҳудудларда карантин чекловларини босқичма-босқич юмшатиш юзасидан топшириқ берган эди. Президент томонидан 22 апрель куни ўтказилган видеоселекторда Ўзбекистоннинг коронавирус қайд этилмаган ҳудудларида саноат корхоналари ва кластерлар ўз ишини қайта бошлагани маълум қилинди. 24 апрель куни ўтказилган йиғилишда эса Фарғона ва Қашқадарёдаги коронавирус хавфи паст бўлган ҳудудларда карантин чоралари босқичма-босқич юмшатилиши айтилганди.
Изоҳ (0)