Давлат тест маркази томонидан маълум қилинишича, 2020/2021-ўқув йили учун Ўзбекистон олий таълим муассасаларига кириш имтиҳонларининг тест топшириқлари соддалаштирилади.
Хабар берилишича, Давлат тест марказининг Тест технологияларини ривожлантириш бошқармасидаги Умумтаълим фанлари бўйича тест топшириқларини шакллантириш бўлими бу борада иш олиб бормоқда.
Маълум қилинишича, жорий йил қабул тест синовларида қўлланиладиган тест топшириқлари ўтган йилларда фойдаланилган тест топшириқларига нисбатан соддалаштирилади.
Таъкидланишича, 2019/2020-ўқув йилида олий таълим муассасаларига ўқишга қабул учун ўтказилган тест синовлари жараёнида тарих ва география фанларидан ёзувсиз харита, жадвал, расмли тест топшириқлари қўлланилган эди.
«Абитуриентларнинг тест топшириқларини тез англаб олиши, фикрлаш кўникмаларини ривожлантириш мақсадида эндиликда чет тилларида (инглиз, немис, француз) ҳам ҳолатни ифодалашда расмли тест топшириқлари шакллантирилмоқда. Бу одатдаги талабдан анча осон бўлади», — дейилади ДТМ хабарида.
Шунингдек, биология ва кимё фанларидан расмли тест топшириқлари сони кўпайтирилмоқда.
Бундан ташқари, она тили ва адабиёт фанидан мустақил ўқиш учун тавсия қилинган бадиий асарлардан ва фанга оид чизмали тест топшириқлари сонини кўпайтириш устида ҳаракатлар олиб борилмоқда.
Кимё фанидан шакллантирилаётган тест топшириқлари таркибида назарий саволлар сонининг оширилиши ва лаборатория ишларига оид тест топшириқларини яратиш жараёнлари давом этмоқда.
Соддалаштириш ишлари физика фани бўйича ҳам амалга оширилмоқда ва бу қуйидаги кўринишда акс этади:
- ўтган йилларда ўтказилган қабул тест синовларининг мазкур фан бўйича натижалари таҳлили ҳамда фуқаролар мурожаатларини инобатга олган ҳолда физика фанидан биринчи қийинлик даражасидаги (энг осон) тест топшириқлари сони 6 тадан 10 тагача кўпайтирилади;
- жами тест топшириқлари таркибида назарий тест топшириқларининг улуши оширилади;
- абитуриентларга қулайлик яратиш мақсадида «Доимий физик катталиклар жадвали» ишлаб чиқилди ва у тест синовлари жараёнида тақдим этилади.
Аввалроқ «Олий таълим муассасаларига кириш имтиҳонларини янада соддалаштириш тўғрисида»ги Президент қарори лойиҳаси жамоатчилик муҳокамасига қўйилгани ҳақида хабар берилган эди. Мазкур қарор лойиҳаси Ўзбекистон ОТМларига кириш имтиҳонлари янада соддалаштирилишни кўзда тутади.
Изоҳ (0)