Хитойда COVID-19 пандемияси сабаб интернет фойдаланувчилари сони 900 миллиондан ошиб кетди. Бу ҳақда Хитой ахборот тармоқлари маркази томонидан мамлакатда интернетнинг ривожланиши тўғрисидаги 45-ҳисоботида сўз боради, деб хабар қилади «РИА Новости».
Ҳисобот 2019 йилнинг иккинчи ярим йиллигидан 2020 йилнинг март ойигача бўлган даврни ўз ичига олади.
Маълумотларга кўра, 2020 йилнинг март ойи бўйича Хитойда интернет фойдаланувчилари сони 904 миллион кишига етган, бу 2018 йилнинг охири билан таққослаганда 75 миллион одамга кўп демакдир. Мамлакатда интернет тарқалиши коэффициенти 64,5 фоизни ташкил этган. Шу билан бирга, 99,3 фоиз фойдаланувчилар тармоққа мобил телефонлари орқали кирган, 896 миллион одам эса тезкор хабар аламашиш сервисларидан фойдаланган — бу 2018 йилнинг охирига нисбатан 100 миллион кишига кўп.
Хитойдаги интернет фойдаланувчиларининг 80 фоиздан ортиғи (731 миллион) янгиликларни тармоқдан ўқиган — бу 2018 йилга нисбатан қарийб 56 миллион кишига кўп демак.
Шунингдек, интернет орқали харидларни амалга оширадиган фойдаланувчилар сони 710 миллион кишига етган.
Таъкидланишича, коронавирус пандемияси сабаб кўнгилочар онлайн-платформалардан фойдаланувчилар сони ортиб кетган. 2020 йил март ҳолатига кўра, фойдаланувчилар орасида видеороликларнинг оммабоплиги тезкор хабар алмашиш сервислардан кейин иккинчи ўринни эгаллаган. Рақамларда келтирилишича, онлайн-видеоролик платформаларидан фойдаланувчилар 850 миллион кишига етган — бу 2018 йил билан таққосланганда 126 миллион кишига кўп.
Бундан ташқари, масофадан туриб таълим олиш платформаларига бўлган талаб ҳам ошиб кетган — 423 миллион фойдаланувчи. Давлат хизматларидан онлайн фойдаланувчи фуқаролар сони эса 694 миллион кишига етган.
Эслатиб ўтамиз, Республика махсус комиссиясининг қарорига кўра, Ўзбекистонда 2019/2020-ўқув йили онлайн тарзда якунланадиган бўлди. Мамлакатда интернет орқали тиббий маслаҳат олиш имконияти яратилган, шунингдек, банк, солиқ, таълим соҳасида ҳам соҳаларида иш онлайн ташкил қилинган.
Изоҳ (0)