Россияда коронавирусдан вафот этганлар сони бўйича кунлик рекорд янгиланди

Россияда сўнгги бир суткада коронавирусдан 72 киши вафот этди. Бу эпидемия бошланганидан буён қурбонлар сони бўйича янги кунлик рекорд ҳисобланади. Бу ҳақда Касалликка қаршу кураш бўйича тезкор штаб хабар берди.

Маълум қилинишича, Россияда коронавирусдан вафот этганларнинг умумий сони 867 кишига етган. Бир кунлик ўлимлар сони бўйича аввалги рекорд 25 апрелда қайд этилган бўлиб, ўшанда ўлим ҳолатлари сони 66 тани ташкил қилган эди. 26 апрель куни ҳам 66 нафар бемор касалликдан вафот этган, 27 апрель куни эса 50 та ўлим ҳолати ҳақида хабар берилган.

Мамлакатда бир суткада коронавирус билан касалланиш бўйича 6411 та янги ҳолат қайд этилган. Янги ҳолатлар Россиянинг 83 та ҳудудида қайд этилган. Бир суткада касалликдан тузалганлар сони эса 1110 кишини ташкил қилган.

Касалланганлар ва вафот этганларнинг умумий сони бўйича Москва етакчилик қилмоқда. Шаҳарда 48 426 нафар бемор қайд этилган, уларнинг 479 нафари касаллик оқибатида вафот этган. Москва вилояти эса 10 231 нафар бемор ва 74 та ўлим ҳолати билан иккинчи ўринда турибди.

Россиянинг Тиббий биология федерал агентлиги раҳбари Вероника Скворцова жорий ҳафта Россияда касаллик ўзининг энг юқори чўққисига чиқиши мумкинлигини айтган. Россия президенти матбуот котиби Дмитрий Песков 22 апрель куни берган интервьюсида мамлакатда кунлик аниқланадиган янги ҳолатлар май ойининг ўртасида энг юқори нуқтага чиқиши ҳақида гапирган.

Россияда апрель ойининг охиригача ишланмайдиган кунлар режими амалда бўлади. Кўплаб ҳудудларда эса мажбурий тартибда «ўзини яккалаш» режими жорий қилинган. Аксарият ҳудудларда чекловлар май ойидаги байрамларгача узайтирилиши мумкин.

Аввалроқ Россия коронавирусга чалинганлар сони бўйича Хитойдан ўтиб кетгани ҳақида хабар берилган эди. Россия президенти Владимир Путин келаси ҳафтада мамлакатдаги коронавирус билан боғлиқ вазият юзасидан янги баёнот билан ОАВда чиқиш қилиши мумкин.

Сўнгги маълумотларга кўра, Россияда коронавирусга чалинган беморларнинг умумий сони 93 500 кишидан ошган. Касалликдан соғайганлар сони эса 8456 кишига етган. Мамлакат бўйича касалликдан 867 киши вафот этган.