Коронавирус инфекциясининг тарқалишига қарши чора сифатида 24 апрелдан Самарқанд вилоятининг Тойлоқ туманига кириш ва чиқиш чеклангани ҳақида хабар берилган эди.
Марказий ҳарбий округ қўшинлари қўмондони полковник Ойбек Саидовнинг кўрсатмасига асосан кучишлатар тузилмалар билан ҳамкорликда яна бир махсус ишлов бериш йиғма отряди мазкур туманга йўналтирилди. Бу ҳақда «Дарё»га ҳарбий журналист Ғайрат Мадраҳимов маълум қилди.
Қисқа фурсатда биологик зарарланиш вазиятида дезинфекция тадбирларини ўтказиш бўйича ҳамкорликдаги ҳаракатлар режаси ишлаб чиқилиб, йиғма отряд зиммасига изоляция қилинган ҳудудни хавфли инфекциядан батамом тозалаш вазифаси юкланди.
27 апрель куни дезинфекция ишларида фаоллик кўрсатган Мудофаа, Фавқулодда вазиятлар, Ички ишлар, Соғлиқни сақлаш вазирликлари, Миллий гвардия, Самарқанд шаҳар Ободонлаштириш бошқармаси ходимлари ҳамда блокпостларда сергаклик билан хизматни ўтаётган ҳарбийлар ҳарбий округ қўмондонлиги томонидан рағбатлантирилди.
Бундан ташқари, туманда ташкил этилган 35 га яқин блокпост аҳоли ва техникалар ҳаракатини вақтинча чеклаб, бу орқали хавфли инфекцияга қарши самарали курашишга имкон яратмоқда.
Туман марказига олиб кирадиган барча кўчалар ва дала йўлларига автомобиль ҳаракатини чеклаш учун бетон тўсиқлар ўрнатилган. Асосий йўллар ва кўприкларда ҳарбий хизматчилар ўзига бириктирилган қурол-аслаҳа ҳамда жанговар техникаларда патруллик хизматини олиб бормоқда.
Тойлоқ туманидаги блокпостларга жалб қилинган қўриқлаш бўлинмаси шахсий таркиби 14 кундан сўнг Самарқанд ҳарбий госпиталига карантинга жойлаштирилиши кўзда тутилган.
Изоҳ (0)