Фарғона вилоятида етти нафар, Қашқадарё вилоятида эса бир нафар коронавирус инфекциясига чалинган бемор соғайиб, реабилитацияга кузатилди. Бу ҳақда Соғлиқни сақлаш вазирлиги матбуот хизмати хабар бермоқда.
Фарғонада соғайганларнинг икки нафари эркак, беш нафари аёл бўлиб, тўрт нафари Фарғона вилоятидан, икки нафари Тошкент шаҳридан ва бир нафари Сирдарё вилоятидан. Уларнинг беш нафари Туркиядан келган ва карантинга олинган, касаллик аниқлангач шифохонага ётқизилган.
Қолган икки нафари эса коронавирус инфекциясига чалинганлар билан мулоқотда бўлиб, касалликни юқтириб олган. Энг ёши каттаси 48 ёшда бўлса, энг ёши кичиги 2020 йилда туғилган.
Қашқадарёда тузалиб чиққан 14 ёшли (эркак) бемор Чироқчи туманидан бўлиб, коронавирус инфекциясига чалинганлар билан мулоқотда бўлиб, касалликни юқтириб олган эди.
Қайд этиш жоиз, шу вақтгача Фарғона вилоятида 52 нафар бемор (энди 59 нафар), Қашқадарёда эса тўрт нафар бемор соғайган эди (энди беш нафар). Айни вақтда Фарғонада 64 бемор даволанишни давом эттирмоқда, Қашқадарёда эса коронавирусга чалинган фақат бир бемор қолди.
Шундай қилиб, Ўзбекистонда 28 апрель соат 12:20 ҳолатига кўра коронавирус инфекциясидан бутунлай соғайганлар сони 900 нафарни ташкил этмоқда.
Маълумот учун, 28 апрель соат 10:00 ҳолатига кўра Ўзбекистонда коронавирусга чалинган беморлар сони 1924 нафарга етди, уларнинг саккиз нафари вафот этган.
Изоҳ (0)