Бухоро вилоятида 27 апрель оқшомида кузатилган кучли шамол ва ёмғир натижасида газ қувурлари ва газ таъминоти тизимининг бошқа объектларида 120 дан ортиқ авария ҳолатлари аниқланди, дея хабар бермоқда «Ҳудудгазтаъминот» компанияси.
Хусусан, «Шофиркон-1», «Шофиркон-2», «Пешку-1», «Пешку-2», «Ромитан-2», «Ромитан-3», «Ромитан-4», «Жондор-1», «Известковий», «Ғиждувон», «Шофиркон-2» каби газ тақсимлаш станциялари (ГРС) ва «Ғиждувон», «Олот» ва «Қоракўл» каби йўналишлар фавқулодда ўчирилган.
138 мингдан ортиқ хонадон вақтинча газ таъминотидан узилган. Жумладан, Навоий вилоятининг Конимех, Навбаҳор, Қизилтепа, Кармана туманларида 21 557 та, Сирдарё вилоятининг Боёвут туманида 6 100 та, Бухоро вилоятининг Бухоро, Когон, Ромитан, Пешку, Ғиждувон, Шофиркон, Қоровулбозор, Вобкент, Жондор, Қоракўл ва Олот туманларида 110 490 та, Самарқанд вилоятининг Каттақўрғон, Пахтачи, Иштихон, Нарпай туманларида 141 та хонадон вақтинча газсиз қолди.
Қайд этишларича, «Ҳудудгазтаъминот» компаниясининг ҳудудлардаги таркибий бўлинмаларининг тезкор тиклаш гуруҳлари табиий офат сабабли зарар етган жойларда таъмирлаш ишларини бошлаб юборди. Ҳудудлар кесимида аҳолига табиий газ етказиб беришни қайта тиклаш тўғрисидаги маълумот қўшимча равишда тақдим этилиши маълум қилинди.
«Ҳудудгазтаъминот» компанияси газ таъминоти тизимида носозликлар, газ сизиб чиқиши ёки бошқа фавқулодда вазиятлар аниқланганда, дарҳол авария-диспетчерлик хизматининг 104 ёки 1104, 71 200-08-04 рақамларига хабар беришни сўраган.
Эслатиб ўтамиз, 28 апрелга ўтар кечаси кузатилган кучли шамол оқибатида Бухоро вилоятида салкам 30 киши тан жароҳати олган, бир киши ҳалок бўлган. Аввалроқ «Ўзбекистон миллий электр тармоқлари» компанияси ҳам кучли шамол оқибатида юзага келган авария ҳолатлари сабаб электр таъминотининг фавқулодда ўчиш ҳолатлари юз бераётганини маълум қилган эди.
Изоҳ (0)