27 апрелдан 28 апрелга ўтар кечаси Туркманистон ҳудудидан кучли шамол кириб келиб, Ўзбекистоннинг бир қатор вилоятларида сониясига 9—40 метр тезликда шамол эсиши кузатилгани ҳақида хабар берилганди. «Ҳудудий электр тармоқлари» АЖ матбуот хизматининг маълум қилишича, Бухоро, Навоий ва Қашқадарё вилоятларининг айрим ҳудудларида аҳоли хонадонлари ва ижтимоий соҳа объектларида электр энергиясида узилишлар вужудга келган.
Дастлабки маълумотларга кўра, республика бўйича, 110 кВ ҳаво линияларида 10 дан ортиқ, 35 кВ ҳаво линияларида 4 та ва 6—10 ҳаво линияларида 210 дан ортиқ узилишлар вужудга келган. Энг катта талафот кўрган ҳудуд Бухоро вилоятига тўғри келади.
«Ҳозирда содир бўлган фавқулодда вазиятлар оқибатларини бартараф этиш бўйича ‘Ҳудудий электр тармоқлари’ АЖнинг электр таъминоти корхоналари ходимлари томонидан тун-у кун таъмирлаш-тиклаш ишлари олиб борилмоқда», — дейилади хабарда.
«Ўзгидромет» маълумотига кўра, бундай ноқулай об-ҳаво шароити бугун, 28 апрель куни, ҳам республиканинг айрим ҳудудларида давом этиши мумкин. Шуни ҳисобга олган ҳолда, «Ҳудудий электр тармоқлари» АЖ аҳолини электр энергиясида вужудга келиши мумкин бўлган узилишлардан огоҳлантиради.
Аввалроқ Бухорода кучли шамол оқибатида бир киши ҳалок бўлди, 30 киши жароҳатлангани ҳақида хабар берилганди. Шамолдан сўнг Бухоро, Навоий, Сирдарё ва Самарқанддаги салкам 140 минг хонадон газсиз қолган.
Изоҳ (0)