Бразилия терма жамоаси собиқ ҳужумчиси Роналдиньо Парагвайдаги ҳибсдан сўнг илк бор интервью берди.
Март ойи бошларида 40 ёшли бразилиялик Парагвай ҳудудига сохта паспорт билан кирганлиги учун ҳисбга олинганди. Шундан кейин Роналдиньо акаси билан 32 кун давомида қамоқда сақланди. Ҳозирда ака-ука Асунсёндаги меҳмонхонада уй қамоғида бўлиб турибди.
Маҳаллий ABC Color телеканалига берган интервьюсида Роналдиньо Парагвайга онлайн-казино очилиш маросимига келганини маълум қилди.
«Барча ҳужжатлар қалбаки эканини билганимизда ҳайрон қолдик. Вазиятнинг тагига етиш учун ўша заҳоти ҳуқуқни муҳофаза қилиш ходимлари билан ҳамкорлик қилишга тайёр эканимизни маълум қилдик.
Ҳибсда сақланишимни эшитиш катта зарба бўлди, бундай ҳолатга тушаман деб сира ўйламагандим. Ҳаётим юқори мақсадлар ва ўз футболим билан одамларга завқ улашишга қаратилган.
Парагвай халқининг меҳр, муҳаббат ва ҳурматини илк кунларданоқ ҳис қилиб турдим. Бунинг учун хурсандман, ишонч мустаҳкамланди. Ҳаммаси яхши бўлиши учун дуодаман, умид қиламанки, барчаси тез орада якунланади.
Озод бўлганимдан кейин биринчи навбатда онамни қучаман. Шундан кейин бу вазиятни ҳазм қилган ҳолда ишонч ва янги куч билан олға юришда давом этаман», — дейди Роналдиньо.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)