Исроил Олий суди махсус қонун қабул қилинмагунича, ҳукумат коронавирусга қарши кураш мақсадида фуқароларнинг ҳаракатини кузатиши мумкин эмас, деб қарор чиқарди. Бу ҳақда суд баёнотига асосланиб, Reuters хабар бермоқда.
Март ойида ҳукумат фавқулодда ҳолат тартибини жорий этган, шундан сўнг хавфсизлик хизмати фуқароларнинг мобил маълумотларини кузатишни бошлаган эди. Бундай технологиялардан аввалроқ террорчиликка қарши курашда фойдаланилган эди, бироқ пандемия вақтида маълумотлар Соғлиқни сақлаш вазирлиги учун тўпланган.
Исроиллик журналистлар ва ҳуқуқ фаоллари бунга қарши чиққан. Суд «махфийлик тамойилларига мувофиқ келадиган муносиб муқобил вариант»ни топиш зарурлигини тан олди. 30 апрелга қадар қонун лойиҳасини тайёрлашга кирилиши ва бир неча ҳафта ичида ҳужжат тайёр бўлиши кутилмоқда.
Исроил полициясининг алоҳида қайд этишича, қўлланилган технология самарали эди. 22 апрель ҳолатига кўра, ушбу технология воситасида карантин тартибини бузган 200 дан ортиқ фуқаро қўлга олинган эди. Маълумот учун, Исроилда 15 мингдан ортиқ одам коронавирусга чалинган, 200 киши вафот этган, 6,5 минг киши соғайган.
Изоҳ (0)