Россия махсус хизматлари ходими Чехия пойтахти Праганинг мэри Зденек Гржиб ва шаҳарнинг 6-тумани маъмурияти раҳбари Ондржей Коларж ҳаётига суиқасд уюштиришга уринишда гумон қилинмоқда. Бу ҳақда Чехиянинг Respect нашрига таяниб, «Эхо Москви» хабар бермоқда.
Respect’нинг Чехия куч ишлатар тузилмаларидаги манбаларга таяниб хабар беришича, уч ҳафта олдин Россиядан дипломатик паспортга эга эркак келган, уни Прага аэропортида Россия дипломатик ваколатхонаси автомобили кутиб олиб, элчихонага олиб борган. Йўловчининг портфелида ўлимга олиб келувчи рицин заҳарли моддаси бўлган, деб тахмин қилинмоқда.
Чехия махсус хизматлари Россиядан шундай одам келишидан олдиндан хабардор бўлган; уларнинг тахминича, заҳарли модда Прага шаҳрининг 6-тумани маъмурияти раҳбари Ондржей Коларж ва шаҳар мэри Зденек Гржибга мўлжалланган. Ҳозирги вақтда ҳар иккала мансабдор кун-у тун қўриқловга олинган.
Россия Ташқи ишлар вазирлиги ҳозирча ушбу ҳолат юзасидан бирор изоҳ бергани йўқ.
Қайд этишларича, Ондржей Коларж аввалроқ Прагадаги рус генерал Конев шарафига ўрнатилган ҳайкални олдиртириш ташаббуси билан чиққан эди (ҳайкал 2020 йил 3 апрель куни демонтаж қилинган), Зденек Гржиб эса яқинда Россиянинг Прагадаги элчихонаси олдидаги майдонга россиялик марҳум мухолифатчи Борис Немцов номини бериш ҳақидаги қарорни имзолаган эди.
Изоҳ (0)