Аллергия ва юқумли касалликлар миллий институти раҳбари Энтони Фаучининг айтишича, АҚШда COVID-19’ни аниқлаш учун ўтказиладиган синовлар сони икки бараварга ошириши мумкин. Бу ҳақда CNN телеканали хабар бермоқда.
Унинг қайд этишича, ҳозирда ҳафтасига 1,5-2 миллионта тест ўтказилмоқда. Фаучи коронавируснинг олдини олишда тест муҳим роль ўйнашини таъкидлаган. Шунингдек, изоляцияга ва одамлар билан ижтимоий алоқаларни чеклашга ҳам риоя қилиш кераклигини айтган.
Аввалроқ АҚШда коронавирусга қарши ўтказилаётган тестлар сони кескин қисқаргани ҳақида хабар берилган эди. Мамлакат вице-президенти Майкл Пенс маълумотларига кўра, АҚШда 5,1 миллиондан ортиқ одам коронавирусга тест топширди.
Жонс Ҳопкинс университети маълумотларига кўра, АҚШда коронавирус билан касалланганлар сони 939 минг кишидан, вирус қурбонлари эса 53 минг кишидан ошиб кетган. Бутун дунё бўйлаб эса COVID-19 оқибатида вафот этганлар 203 минг кишидан ошди.
Изоҳ (0)