Isroil Oliy sudi maxsus qonun qabul qilinmagunicha, hukumat koronavirusga qarshi kurash maqsadida fuqarolarning harakatini kuzatishi mumkin emas, deb qaror chiqardi. Bu haqda sud bayonotiga asoslanib, Reuters xabar bermoqda.
Mart oyida hukumat favqulodda holat tartibini joriy etgan, shundan so‘ng xavfsizlik xizmati fuqarolarning mobil ma’lumotlarini kuzatishni boshlagan edi. Bunday texnologiyalardan avvalroq terrorchilikka qarshi kurashda foydalanilgan edi, biroq pandemiya vaqtida ma’lumotlar Sog‘liqni saqlash vazirligi uchun to‘plangan.
Isroillik jurnalistlar va huquq faollari bunga qarshi chiqqan. Sud “maxfiylik tamoyillariga muvofiq keladigan munosib muqobil variant”ni topish zarurligini tan oldi. 30-aprelga qadar qonun loyihasini tayyorlashga kirilishi va bir necha hafta ichida hujjat tayyor bo‘lishi kutilmoqda.
Isroil politsiyasining alohida qayd etishicha, qo‘llanilgan texnologiya samarali edi. 22-aprel holatiga ko‘ra, ushbu texnologiya vositasida karantin tartibini buzgan 200 dan ortiq fuqaro qo‘lga olingan edi. Ma’lumot uchun, Isroilda 15 mingdan ortiq odam koronavirusga chalingan, 200 kishi vafot etgan, 6,5 ming kishi sog‘aygan.
Izoh (0)