Коронавирус пандемияси сабабли Халқ таълими вазирининг буйруғига асосан 1 апрелдан бошлаб, ходимларни ишга қабул қилиш тўхтатилган. Бу ҳақда 25 апрель куни, АОКАда ўтказилган брифингда Халқ таълими вазирлиги ахборот хизмати раҳбари Анвар Умаров маълум қилди, дея хабар бермоқда «Дарё» мухбири.
Брифингда «Мен мактабда ўқитувчи бўлиб ишлардим. 2019 йили муддатли ҳарбий хизматга кетдим. Хизматдан шу йилнинг март ойи охирида қайтиб келиб, мактаб маъмуриятига ишга қайтиш тўғрисида ариза ёздим. Аммо улардан коронавирус сабабли ишга олиш тўхтатилгани ҳақидаги жавоб олдим. Бу қанчалик тўғри?, — деган саволга Халқ таълими вазирлиги ахборот хизмати раҳбари қуйидагича жавоб берди.
«Республикадаги ҳозирги вазиятдан келиб чиқиб, давлат бюджети маблағларидан янада самарали ва мақсадли фойдаланишни таъминлаш мақсадида Халқ таълими вазирининг жорий йил 13 апрель куни 105-сонли буйруғи қабул қилинди», — деди Анвар Умаров.
Шунингдек, ушбу ҳужжатда мамлакатда мавжуд эпидемиологик вазият барқарорлашгунча умумтаълим мактабларида ўқитувчилар ва бошқа ходимларнинг турли сабабларга кўра меҳнатга лаёқатсизлик даврида (ҳомиладорлик, туғруқ таътили ва бошқа ҳолатлар) бўлган ҳамда бола парваришлаш таътилидан чиққан ходимларнинг дарс соатларини ходимлар ўртасида қайта тақсимланишига ва бўшаб қолган лавозимлар бўйича штат бирликларига ишга қабул қилинишига йўл қўйилмаслиги белгилангани айтилди. Мазкур тартиб вақтинчалик бўлиб, жорий йилнинг 1 апрелидан йўлга қўйилгани маълум қилинди.
Айни пайтдаги вазият барқарорлашгандан сўнг юқорида белгиланган вақтинчалик кўрсатмалар бекор қилинади. Сўнгра таълим муассасаларига амалдаги меҳнат қонунчилиги асосида мутахассислигингиз бўйича улардаги бўш (вакант) лавозимларга ишга қабул қилиш юзасидан мурожаат этишингиз мумкин», — деди Анвар Умаров.
Изоҳ (0)