Koronavirus pandemiyasi sababli Xalq ta’limi vazirining buyrug‘iga asosan 1-apreldan boshlab, xodimlarni ishga qabul qilish to‘xtatilgan. Bu haqda 25-aprel kuni, AOKAda o‘tkazilgan brifingda Xalq ta’limi vazirligi axborot xizmati rahbari Anvar Umarov ma’lum qildi, deya xabar bermoqda “Daryo” muxbiri.
Brifingda “Men maktabda o‘qituvchi bo‘lib ishlardim. 2019-yili muddatli harbiy xizmatga ketdim. Xizmatdan shu yilning mart oyi oxirida qaytib kelib, maktab ma’muriyatiga ishga qaytish to‘g‘risida ariza yozdim. Ammo ulardan koronavirus sababli ishga olish to‘xtatilgani haqidagi javob oldim. Bu qanchalik to‘g‘ri?, — degan savolga Xalq ta’limi vazirligi axborot xizmati rahbari quyidagicha javob berdi.
“Respublikadagi hozirgi vaziyatdan kelib chiqib, davlat budjeti mablag‘laridan yanada samarali va maqsadli foydalanishni ta’minlash maqsadida Xalq ta’limi vazirining joriy yil 13-aprel kuni 105-sonli buyrug‘i qabul qilindi”, — dedi Anvar Umarov.
Shuningdek, ushbu hujjatda mamlakatda mavjud epidemiologik vaziyat barqarorlashguncha umumta’lim maktablarida o‘qituvchilar va boshqa xodimlarning turli sabablarga ko‘ra mehnatga layoqatsizlik davrida (homiladorlik, tug‘ruq ta’tili va boshqa holatlar) bo‘lgan hamda bola parvarishlash ta’tilidan chiqqan xodimlarning dars soatlarini xodimlar o‘rtasida qayta taqsimlanishiga va bo‘shab qolgan lavozimlar bo‘yicha shtat birliklariga ishga qabul qilinishiga yo‘l qo‘yilmasligi belgilangani aytildi. Mazkur tartib vaqtinchalik bo‘lib, joriy yilning 1-aprelidan yo‘lga qo‘yilgani ma’lum qilindi.
Ayni paytdagi vaziyat barqarorlashgandan so‘ng yuqorida belgilangan vaqtinchalik ko‘rsatmalar bekor qilinadi. So‘ngra ta’lim muassasalariga amaldagi mehnat qonunchiligi asosida mutaxassisligingiz bo‘yicha ulardagi bo‘sh (vakant) lavozimlarga ishga qabul qilish yuzasidan murojaat etishingiz mumkin”, — dedi Anvar Umarov.
Izoh (0)