Москва шаҳрида COVID-19 коронавирус инфекцияси оқибатида вафот этганлар сони 400 кишидан ошди. Бу ҳақда мамлакатнинг коронавирусга қарши курашиш бўйича тезкор штаби хабар берди.
Ўтган бир сутка ичида Россия пойтахтида 38 киши коронавирус оқибатида вафот этган. Шундай қилиб, бутун шаҳар бўйлаб COVID-19 қурбонлари сони 404 кишига етди.
Тезкор штаб вафот этганларнинг ёши, шунингдек, улар бошқа касаллардан ҳам азият чеккан ёки чекмаганлигига ойдинлик киритмаган.
Сўнгги маълумотларга кўра, Россия коронавирус билан касалланиш бўйича 74,6 мингдан ортиқ ҳолат қайд этилган бўлиб, беморларнинг 6250 нафари даволанишга муваффақ бўлган. Бутун мамлакат бўйлаб COVID-19 оқибатида вафот этганлар сони 681 кишига етган. Касаллар сони бўйича Москва шаҳри етакчилик қилмоқда — 39,5 минг бемор. Унинг ортидан Москва вилояти (8494 бемор, 69 қурбон), Санкт-Петербург (2926 бемор, 23 қурбон) ва Нижегородск вилояти (1214 бемор, 8 қурбон) ўрин олган.
Аввалроқ Москвадаги барча тиббиёт ходимларининг COVID-19’га қарши иммунитети текширилиши маълум қилинганди. Россияда COVID-19 ташхисини қўювчи 17 та тест давлат рўйхатидан ўтказилган.
Мавзуга доир: Коронавирус сабабли Россия иқтисодиёти кунига 100 млрд рубл йўқотаётгани маълум қилинди
Изоҳ (0)