Қашқадарё вилоятининг Чироқчи туманида тарвуз етиштирувчи деҳқонлар 2020 йил 7 та давлатга 100 минг тонна тарвуз экспорт қилади. Бу ҳақда «Дарё»га туман ҳокимлиги ахборот хизмати раҳбари Собит Раимқулов хабар бермоқда.
Маълум бўлишича, 2020 йил 385 та фермер хўжалиги ва 591 та томорқа эгалари 14 минг гектар майдонда тарвуз етиштирмоқда. Шундан 5 минг гектардан ортиқ майдонга экилган эртапишар тарвуз 10 майдан бошлаб сотувга чиқади.
«Деҳқонларимиз етиштирган тарвуз Россия, Афғонистон, Қозоғистон, Қирғизистон, Тожикистон, Украина, Беларусь каби 7 та давлатга экспорт қилинади. Деҳқонларимиз ўтган йили 25 минг тонна тарвуз экспорт қилган бўлса, бу йил 100 минг тонна тарвуз сотишни режа қилишган», — дейди туман ҳокими ўринбосари Маъруф Пирназаров.
Маъруф Пирназаровнинг қўшимча қилишича, эртапишар тарвуз етиштирувчи деҳқонлар бир гектар майдондаги ҳосилдан 50 миллион сўмгача даромад қилади.
Эслатиб ўтамиз, Шавкат Мирзиёевнинг 2018 йил декабрь ойида вилоятга ташрифи чоғида Чироқчи туманидаги лалми ерларда ҳам тарвуз етиштиришга алоҳида эътибор қаратиш лозимлиги таъкидланганди.
Изоҳ (0)