Таҳлилларга кўра, Ўзбекистонда оилавий ажримлар эр-хотин келишмовчилиги (50,5 фоиз), бефарзандлик (16,3 фоиз), узоқ вақт бирга оила бўлиб яшамаслик (10 фоиз), миграция (2,8 фоиз), хиёнат (3,4 фоиз) ва бошқа омиллар (17,0 фоиз) сабаб юзага келмоқда. Бу ҳақда 25 апрель куни АОКАда ўтказилган брифингда Маҳалла ва оилани қўллаб-қувватлаш вазирлиги вакили сўз юритди, дея хабар бермоқда «Дарё» мухбири.
Вазирлик расмийсининг айтишича, 2020 йилнинг ўтган даври мобайнида жами 49 минг 811 та никоҳ ва 7 минг 857 та ажралиш ҳолати қайд этилган. Оила билан боғлиқ салбий ҳолатлар Тошкент шаҳрида (31,1 фоиз), Сирдарё (25,6 фоиз), Навоий (22,7 фоиз), Андижон (21,2 фоиз) ва Тошкент вилоятларида (20,2 фоиз) кўп кузатилган.
«Карантин даврида оилавий келишмовчиликлар ортиб бораяпти, деган нуқтаи назар нотўғри. Аксинча, ушбу синовли кунлар оилалар, маҳаллаларда ноёблашиб қолган меҳр-оқибатни қайтарди, ҳамжиҳатлик, ўзаро дахлдорлик ҳисси ортяпти. Қолаверса, биз ўзбек халқида оғир кунларда бир-бирини суяш, кечириш фазилати устувор.
Қандай вазият ва ҳолат бўлмасин, вазирлик оилаларда ижтимоий-маънавий муҳитни барқарорлаштириш, оилавий ажримларнинг олдини олишга қаратилган ишларни сира эътибордан четда қолдирмайди», — деди вазирлик ахборот хизмати раҳбари Саодат Боймирзаева.
Изоҳ (0)