Қашқадарё вилоятининг Яккабоғ туманида яшовчи фуқаролар 1 февралдан ов мавсуми тўхтатилганига қарамай, ноқонуний равишда каклик овлаб, табиатга 2 миллион 676 минг сўм зарар келтирди. Бу ҳақда «Дарё»га вилоят Экология ва атроф муҳитни муҳофаза қилиш бошқармаси ахборот хизмати раҳбари Карима Ёдгорова маълум қилди.
Бошқарма ходимлари томонидан 21 апрель куни ўтказилган текширувда Яккабоғ туманининг Татар ва Турон қишлоқларида яшовчи уч фуқаро Қашқадарё давлат ўрмон хўжалиги Қизилтом ўрмон бўлими «Зармас» участкасида ўзларига тегишли 16 дона тақиқланган тузоқ билан 12 бош каклик овлаётган пайт қўлга олинган.
12 какликнинг тўрттаси табиат қўйнига учириб юборилган, қолганлари (нобуд бўлгани) эса ашёвий далил сифатида олиб қўйилган. Табиатга зарар келтирганлар иши ҳужжатлаштирилиб, судга тақдим этилган.
Изоҳ (0)