Тошкент тиббиёт академияси (ТошТА) кўп тармоқли клиникасида 24 апрель куни олти нафар бемор коронавирусдан соғайиб, реабилитацияга кузатилди. Соғлиқни сақлаш вазирлиги (ССВ)дан маълум қилишларча, бу беморларнинг бари касалликни коронавирусга чалинганлар билан мулоқот вақтида юқтириб олган эди.
Фото: «Дарё» / Мадина Нурман
«Беморлардан уч нафари эркак, яна уч нафари аёллардир. Улардан беш нафари Тошкент шаҳридан, бир нафари Қашқадарё вилоятидан. Энг ёши каттаси 27 да бўлса, энг кичиги 10 ёшда, улар орасида 22 ёшли эгизак ака-ука ҳам бор», — дейилади ССВ ахборотида. Қайд этишларича, бунгача ТошТА клиникасида 42 бемор соғайган эди.
Аввалроқ 24 апрель ҳисобидан Қашқадарёда икки киши, Фарғона вилоятида 19 киши (улар орасида уч ойлик чақалоқ ҳам бор), Тошкентда эса 10 киши — жами 31 киши коронавирусдан соғайгани маълум қилинган эди. Шундай қилиб, Ўзбекистон бўйича коронавирус инфекциясидан бутунлай соғайганлар сони 24 апрель соат 13:30 ҳолатига кўра 598 нафарни ташкил этмоқда.
Эслатиб ўтамиз, 24 апрель соат 10:00 ҳолатига кўра Ўзбекистонда коронавирус инфекциясини юқтириб олиш билан боғлиқ 1778 та ҳолат аниқланган, беморларнинг етти нафари вафот этган.
