Андижонда қўшнилари ва профилактика инспекторини ҳақорат қилган ва Наманган вилояти билан чегарада ташкил қилинган назорат пунктида жамоат тартибини бузган фуқаролар 15 суткага қамалди. Бу ҳақда «Дарё»га Андижон вилояти Маъмурий суди раиси Отабек Мирзамаҳмудов хабар бермоқда.
Маълум бўлишича, 2020 йилнинг 9 апрель куни тахминан соат 21:00 да Тошкент шаҳрида яшовчи 37 ёшли фуқаро У.Н. Балиқчи туманидан Наманган вилоятига ўтиш чегарасидаги назорат пунктида ИИБ ходимлари талабига қарши чиққан. Ҳайдовчи А.С. бошқарувидаги Lada русумли автомашинада ниқобсиз, маст ҳолда постдан ўтмоқчи бўлган У.Н. ҳайдовчидан ҳужжат сўраган ЙПХ ходимларини тилга олиб бўлмас сўзлар билан ҳақоратлаган.
Избоскан туман Маъмурий суди ҳуқуқбузар У.Н. ишини кўриб чиқиб, фуқарони Маъмурий жавобгарлик тўғрисидаги кодекснинг 54-моддаси 1-қисми (Эпидемияларга қарши кураш қоидаларини бузиш) ва 183-моддаси (Майда безорилик)да назарда тутилган ҳуқуқбузарликни содир этганликда айблаб, 1 миллион 115 минг сўм миқдорида жарима ҳамда 15 сутка маъмурий қамоқ билан жазолади.
Шунингдек, 10 апрель куни соат 19:30 ларда Андижон шаҳар «Ҳамкорлик» маҳалласида яшовчи Б.С. ҳам маҳалла идораси рўпарасида маст ҳолда уятсиз сўзлар айтиб, жамоат тартиби ва фуқаролар осойишталигини бузган. Бундан ташқари профилактика инспектори С.Ҳурқўзиевнинг қонуний талабларига қаршилик кўрсатиб, уни нафсониятга тегадиган сўзлар билан ҳақоратлаган.
Андижон шаҳар Маъмурий суди ҳуқуқбузар Б.С.ни Маъмурий жавобгарлик тўғрисидаги кодекснинг 54-модда 2-қисми (Эпидемияларга қарши кураш қоидаларини бузиш), 194-модда 1-қисми (Ички ишлар органлари ходимининг қонуний талабларини бажармаслик) билан айбли деб топиб, 1 миллион 338 минг сўм жарима ҳамда 15 сутка маъмурий қамоқ билан жазолашни лозим топган.
Изоҳ (0)