Тузатиш: Хабарнинг дастлабки таҳририга «Қурилиш вазирлиги қурилаётган карантин зоналари келгусида кўп тармоқли шифохоналарга айлантирилиши мумкинлигини маълум қилди» дея сарлавҳа қўйилган, шунингдек, хабарга Ўртасаройда қурилган карантин зонаси сурати илова қилинган эди. Бу хато — карантин зоналари кўп тармоқли шифохоналарга айлантирилмайди. «Дарё» тарқатилган хато ахборот учун муштарийлардан узр сўрайди.
Бу ҳақда 22 апрель куни АОКАда ўтказилган брифингда Қурилиш вазирлиги матбуот котиби Жамолиддин Қаландаров маълум қилди.
Демак, бугунги кунда Коронавирусга чалинган беморларни даволаш юзасидан берилган топшириқ ижросини таъминлаш бўйича Қурилиш вазирлиги томонидан Тошкент шаҳри ва Тошкент ҳамда Наманган вилоятларида қурилиш ишлари олиб бориляпти. Улардан энг каттаси, Зангиота туманида бунёд этилаётган махсус шифохона бўлиб, бу ерда ишлар икки сменада ташкил этилган. Айни вақтда қурилиш жадал олиб бориляпти. Ишнинг кўлами жуда ҳам катта. Ишлар барча босқичларда параллел ташкил этилган, хусусан биноларнинг пойдевор ишлари, металл каркаслар монтажи, сендвич панелли деворлар ўрнатилиши, ички пардозлаш ишлари ва мухандислик тармоқларини ўрнатиш ишлари амалга оширилаяпти. Шу йилнинг 5 майига қадар 2 000 ўринга мўлжалланган блок фойдаланишга топширилиши кўзда тутилган. Бугунги кунда объэктга 2550 га яқин ишчи, муҳандислар ва 600 дан ортиқ оғир техника жалб қилинган.Қолаверса, пойтахтимизнинг ўзида иккита жойда, 3 та шифохонанинг қурилиш ишлари олиб бориляпти. Наманган вилояти Поп тумани Ғурумсарой қишлоғида 150 ўринли махсус шифохона қурилиш ишлари бошлаб юборилган.
Барчангизга маълум, айни кунларда Тошкент вилоятининг Юқори Чирчиқ туманида 53 га ер майдонида умумий сиғими 20 000 ўринли аҳолини вақтинча карантинда сақлаш мажмуаси қуриляпти. Объектнинг 10 000 ўринга мўлжалланган биринчи қисми фойдаланишга топширилиб, карантин учун одамлар жойлаштирилди. Шу кунгача иккинчи қисмининг 8 000 ўринли жойи қуриб битказилди. Объект қисқа муддатларда тўлиқ фойдаланишга топширилади. Бугунги кунда у ерда 3000дан ортиқ ишчи ва муҳандислар, 200 га яқин техника ишламоқда.
Карантин зоналарининг келажаги ҳақида гапирганда айтиш керакки, ушбу мажмуалар карантин холати якунлангач, Соғлиқни сақлаш вазирлиги ҳамда Санитария эпидимиологик осойишталик агентликлари билан келишган холда самарали ишлатилиши ташкил этилади. Пудрат ташкилотлари қурувчилари учун вақтинча яшаш манзили сифатида ҳам фойдаланиш мумкин.
Жамолиддин Қаландаров, Қурилиш вазирлиги матбуот котиби
Мавзуга доир:
- Ислом тараққиёт банки Ўзбекистондаги янги клиникаларни жиҳозлашга 17 млн доллар йўналтирди
- Коронавирусга қарши кураш штаби: «Ўзбекистон коронавирус бўйича исталган воқеалар ривожига тайёр»
- Бир карантин хонасида яшайдиган 3-4 киши орасида вирус аниқланса, бошқалар учун ҳам карантин муддати узайтирилиши маълум қилинди
Изоҳ (0)