Россияда коронавирус инфекциясини аниқлайдиган 17 та тест-тизими рўйхатдан ўтказилган ва улардан лаборатор ташхис қўйишда фойдаланиб келинмоқда. Бу ҳақда Россия соғлиқни сақлаш вазири Михаил Мурашко «Россия 24» телеканали эфирида маълум қилган.
«Яна саккизта тест-тизимининг ҳужжатлари давлат рўйхатидан ўтказиш учун қабул қилиб олинган. Яқин ҳафталар ичида улар ҳам фуқаролар учун ишлаб чиқарилиши кутилмоқда», — дея қўшимча қилган Мурашко.
Бундан ташқари россиялик мутахассислар COVID-19’ни даволашда қўлланиладиган бешта препаратни ишлаб чиқиш бўйича клиник тадқиқотлар ўтказилмоқда.
Унинг айтишича, дориларнинг айримларини оғир аҳволдаги беморларни даволашда қўллаш мумкин. Соғлиқни сақлаш вазири мутахассисларнинг қон плазмасини қуйиш йўли орқали коронавирусни даволаш методларини такомиллаштириш устида ҳам бош қотираётганини таъкидлаб ўтди. Вазирликда донор сифатида таклиф қилиниши мумкин бўлган, коронавирусдан тузалган беморлар ҳақидаги маълумот шакллантирилган ахборот ресурси яратилган.
Россия тезкор штаби берган маълумотга асосан, 22 апрель ҳолатига кўра мамлакатда 57,9 минг нафар одамда коронавирус инфекцияси аниқланган. Эпидемия бошланганидан бери 513 нафар бемор касаллик оқибатида ҳаётдан кўз юмган.
Аввал Москва мэрининг ўринбосари Анастасия Ракованинг коронавирусдан тузалган беморларнинг қони плазмаси касалланганларга қуйиш асосида бошқаларни даволаш методи самара берётганини таъкидлагани, шунингдек, Москва мэри Сергей Собянин плазма донорларига тўланадиган пуллар қийматини белгилаш бўйича ҳужжатни имзолагани, COVREC плазмасининг 150 миллилитр плазмаси 1250 рубль (тахминан 170 минг 520 сўм), яъни 600 миллилитр учун 5 минг рубль (тахминан 682 минг сўм) тўланиши хабар қилинганди.
Изоҳ (0)