AQSh prezidenti Donald Tramp Oq uyda o‘tkazilgan brifing chog‘ida mamlakatga kiruvchi immigrantlar oqimini to‘xtatish to‘g‘risidagi qarorni imzolaganini ma’lum qildi.
“Bu iqtisodiyotimiz o‘sishni boshlaganida jamiyatning barcha qatlamlaridagi ishsiz amerikaliklar birinchi bo‘lib bo‘sh ish o‘rniga da’vogarlik qilishini kafolatlaydi”, — deyiladi bayonotda. Ta’kidlanishicha, ushbu chora AQShga tibbiyot resurslarni tejashga ham yordam beradi.
Avvalroq prezident Donald Tramp mamlakatga kiruvchi immigrantlar oqimi kamida 60 kunga to‘xtatilishini ma’lum qilgandi. Ikki oy davomida hukumat mamlakatdagi iqtisodiy vaziyatni baholaydi va migratsiya oqimi borasida tegishli qarorni qabul qiladi.
Hujjatda koronavirus infeksiyasi tarqalishiga qarshi kurashda zarur bo‘ladigan tibbiyot va boshqa soha xodimlariga, Amerika fuqarolarining turmush o‘rtog‘lari va voyaga yetmagan farzandlariga, shuningdek, ayrim xorijliklar uchun istisno qo‘llash holatlari ko‘rsatib o‘tilgan.
Bundan tashqari, yaqinda o‘tkazilgan USA Today/Ipsos so‘rovning natijalari ham ko‘rsatilgan bo‘lib, immigratsiyaning vaqtincha to‘xtatilishini amerikaliklarning 80 foizi yoqlab chiqqan. Pew Research Center so‘roviga ko‘ra, yana 81 foiz AQSh aholisi immigratsiyani ommaviy tahdid sifatida qarayotgani ma’lum bo‘lgan.
Eslatib o‘tamiz, ayni paytda AQSh koronavirusga chalinganlar va undan vafot etganlar soni bo‘yicha dunyoda birinchi o‘rinda turibdi. Mamlakatda koronavirus bilan kasallanganlar soni 842 ming kishidan oshgan, 76 mingdan ortiq bemor tuzalgan, 46 mingdan ortiq odam vafot etgan.
Izoh (0)