Буюк Британияда Жон Брейшоу исмли фуқаро изоляция вақтида зерикиб, томорқасини қазиётганида камида 50 йил олдин кўмилган Ford Popular 103e автомобилига дуч келгани ҳақида хабар берилганди. Брейшоу икки ҳафта давомида машина кимга тегишли бўлганлиги ва нима сабабдан кўмилгани тўғрисида бош қотириб, у махфий агентга тегишли бўлган бўлиши мумкинлигини тахмин қилганди. Бироқ асл ҳақиқат ундан ҳам қизиқарлироқ бўлиб чиқди, деб хабар беради Motor.
Сирли Ford Popular топилмаси тўғрисидаги сюжетдан Иккинчи жаҳон уруши фахрийси Гарольда Лайлснинг 91 ёшли беваси хабар топган. Айнан у «дафн этилган» автомобиль сирини очган. Аёлнинг сўзларига кўра, 50 йилдан ортиқроқ вақт давомида ерда «ётган» автомобиль унинг эрига тегишли бўлган.
Ўтган асрнинг ўрталарида, Лайслар оиласи ўша уйда яшаган вақтида, Гарольд бозордаги энг арзон моделлардан бири — Ford Popular’ни сотиб олган. Машина ўзининг ишончлилиги билан ажралиб турмаган, орадан икки йил ўтгач эса бузилиб қолган. Лайлс утилизацияга пул тўламаслик учун уни дастлаб томорқасига «яшириб қўйган», кейинчалик эса «дафн қилиш»га қарор қилган. Фахрий Ford Popular’ни кимдир ковлаб олишини тахмин қилган, шу сабабли унга бир неча артефакт — сут учун мўлжалланган «бутилка» ва парафинли банка ташлаб қўйган.
Лайлс 1987 йилда вафот этганидан сўнг, унинг беваси 2019 йилнинг охирида бошқа жойга кўчиб кетган. Уларнинг уйига эса Жон Брейшоу кўчиб келган.
Изоҳ (0)