Volkswagen компанияси Истеъмолчилар ҳуқуқларини ҳимоя қилиш федерал иттифоқи (VZBV) томонидан 260 минг харидорнинг эътирозлари инобатга олиниб киритилган коллектив даъво аризасини суд жараёнларига қадар ҳал этишга ва компенсация тўлашга рози бўлди. Концерн 200 минг харидор билан келишишга муваффақ бўлган ва уларнинг фойдасига 620 миллион евро тўлайди, деб хабар қилади Motor.
Дизельгейт тарихидаги энг катта коллектив даъво аризаси компаниянинг 260 минг мижози томонидан берилган бўлиб, улар жами 830 миллион евро компенсация талаб қилмоқда. Даъво муаллифларининг таъкидлашича, Volkswagen раҳбариятининг бепарволиги сабаб дизель машиналаридан атроф-муҳитга чиқадиган зарарли моддалар қиймати пасайтириб кўрсатилган, бу эса иккиламчи бозорда машиналар нархининг тушиб кетишига олиб келган. Компания автомобиль ишлаб чиқарилган йилга қараб ҳар бир истеъмолчига 1350—6250 евро атрофида компенсация тўлайди.
Аввалроқ барча тўловлар махсус электрон платформа ёрдамида амалга оширилиши маълум бўлганди. Компания қарорига рози бўлмаганлар индивидуал тартибда даъво киритишлари мумкин. Бироқ у ҳолда ишни кўриб чиқиш 2020 йилнинг октябрига қадар чўзилиб кетади. Бундан ташқари, Германия фуқароси бўлмаган ёки машинани 2015 йил 31 декабрдан кейин сотиб олганларга компенсация тўланмайди.
Изоҳ (0)