Тошкентда Matiz туяни уриб, учириб юборган видео тарқалди. ИИВ ҳодиса тафсилотларини ошкор қилди

Ички ишлар вазирлиги Тошкентда Matiz йўлда юрган туяни уриб, учириб юборган ҳолат тасвирланган видео юзасидан маълумот берди.

ИИВ хабарига кўра, ҳодиса 2019 йил 11 июнь куни соат 23:45 атрофида содир бўлган.

Ҳайдовчи С.К. фуқаро Д.Л.га тегишли Matiz русумли транспорт воситасини тегишли меъёрий ҳужжатларсиз Тошкент шаҳри Бектемир тумани ҳудудидаги Олтинтопган кўчаси бўйлаб, Бектемир шоҳкўчаси томонга бошқариб кетаётиб, ҳаракат давомида Coca-Cola биноси қаршисида йўналиши бўйича олдинда ҳайдовчига нисбатан қарама-қарши юриб келаётган она туяни уриб юбориб, ҳодиса жойида ўз вақтида тўхтамай, ҳаракатда давом этиши оқибатида йўлнинг ўнг қаторидаги иккинчи туяни ҳам уриб юборган ва транспорт воситаси ағдарилган», — дейилади ИИВ хабарида.

С.К. тан жароҳати олиб, шифохонага мурожаат қилган. Урилган биринчи туя ҳам жароҳат олган, иккинчи туя воқеа жойида ўлган.

Туялар фуқаро М.К.га тегишли эканлиги аниқланиб, боғлаб қўйилган жойидан бўшалиб, автомобиль йўлига чиқиб қолганлиги маълум бўлган.

2020 йилнинг 7 январь куни Бектемир тумани Маъмурий суди томонидан Маъмурий жавобгарлик тўғрисидаги кодекснинг тегишли моддаларига асосан, фуқаро С.К.га нисбатан базавий ҳисоблаш миқдорининг 5 баравари, фуқаро Д.Л.га нисбатан БҲМнинг 3 баравари ва туялар эгаси М.К.га нисбатан БҲМнинг ярим баравари миқдорида жарима жазоси тайинланган.